قازاقتىڭ نار تۇلعالى الىپ جازۋشىسى، كەمەڭگەر مۇحتار اۋەزوۆتىڭ ۇيىندە قىزىنداي وسكەن گۇلنار رازاققىزى ومارحانوۆا (ازيەۆا) ومىردەن ءوتتى.
گۇلنار اپانىڭ اكەسى رازاق - مۇحتار اۋەزوۆتىڭ اعاسى ەدى.
اناسى ازىمبايقىزى ءاليلا - قۇنانباي قاجىنىڭ ۇرپاعى، ابايدىڭ اعاسى تاكەجاننىڭ نەمەرەسى ەدى.
اسىلدىڭ سىنىعى 1928 جىلى سەمەي وڭىرىندە اباي اۋدانىندا دۇنيەگە كەلدى. بالا كەزىندە اشارشىلىق، قۋعىن-سۇرگىننىڭ ءدامىن-تۇزىن تاتتى.
اۋلەتى اشارشىلىق كەزىندە تۋعان جەرىنەن كەتۋگە ءماجبۇر ەدى. ءبىراز قىرعىز جەرىندە ءجۇرىپ، قازاقستانعا قايتىپ، مەركىدە تۇراتىن بولدى.
كىشكەنتاي گۇلناردى اعاسى مۇحتار اۋەزوۆ الىپ قىزىنداي الماتىدا ءوز ۇيىندە ءوسىردى.
گۇلنار اپا سوعىس كەزىندە اۋەزوۆتىڭ پاتەرىندە ورىس جازۋشىسى پاۋستوۆسكيدىڭ تۇرعانىن ەسىنە جاقسى ساقتادى.
1955 جىلى گۇلنار ومارحانوۆا قاراعاندى قالاسىنىڭ مەديتسينالىق ينستيتۋتىن تامامداعان.
جارتى عاسىرعا جاقىن گۇلنار اپا قاراعاندى وبلىستىق اۋرۋحاناسىندا كوز دارىگەرى بولىپ جۇمىس ىستەدى. وعان قوسا، ءوزى بىتىرگەن ينستيتۋتىنىڭ وفتالمولوگيا كافەدراسىندا ساباق بەرگەن.
گۇلنار اپا مىڭداعان ادامنىڭ كوزىنە وتا جاساپ، قوس جانارىن سوقىرلىقتان ساقتاعان، الەمنىڭ كوركىن كورۋىنىڭ قابىلەتىن قايتارعان. ول وتالاردى قالالاردا عانا ەمەس، شالعايداعى اۋىلداردا، مالشى قىستاقتاردا وتكىزگەن. كەيدە وتالار تۇنگە شەيىن سوزىلىپ كولىكتىڭ فارالارىنىڭ جارىعىندا وتەتىن ەدى.
مىڭداعان شاكىرتتەرىنىڭ العىسى شەكسىز. ولار قازاقستاندا عانا ەمەس، شەتەلدە جۇمىس ىستەيدى.
گۇلنار اپا - "ەڭبەك ارداگەرى", "سوعىس ارداگەرى", " تىڭ يگەرۋ ءۇشىن" توسبەلگىسىنىڭ يەگەرى، "دەنساۋلىق ساقتاۋ ءىسىنىڭ ۇزدىگى", قازاقستاننىڭ ەڭبەك سىڭىرگەن دارىگەرى سياقتى ماراپاتتارىنىڭ يەگەرى.
اكەسىندەي كورگەن مۇحتار اۋەزوۆ تۋرالى
"مۇحتار اعا" كىتابىنىڭ اۆتورى، ونى كەمەڭگەردىڭ 100 جىلدىعىنا ارناپ شىعارعان.
ومىرلىك جارى امەن ازيەۆ - بەلگى ءتىلشى، قالامگەر، رەداكتور، جازۋشى ەدى. قاراعاندى وبلىستىق گازەتىنىڭ رەداكتورى بولىپ بىرنەشە جىل ىستەگەن.
ەكەۋى لەيلا اتتى قىزىن، ەلدوس اتتى ۇلىن وسىرگەن. لەيلا - مەديتسينا سالاسىندا عىلىمدار كانديداتى بولسا، ەلدوس - تەحنيكالىق عىلىمىنىڭ كانديداتى. ارتىندا ءتورت نەمەرە، ءتورت شوبەرە قالدى، دينا اتتى نەمەرەسى اقشتىڭ چيكاگو قالاسىندا ءومىر سۇرەدى. گۇلنار اپانىڭ ارمانى - جارتى عاسىر بۇرىن ايىرىلىسىپ، سودان بەرى كورىسپەگەن كۇپان ەسىمدى بولەسىن تاۋىپ ءبىر كورۋ ەدى. بۇل ارمانى بىلتىر كۇزدە ورىندالدى. قۇنانباي اۋلەتىنىڭ جيەندەرى، ەكى بولە، ەكى توقساننان اسىپ كەتكەن اجە ابايدىڭ 175 جىلدىعىنىڭ قارساڭىندا عالامتور، الەۋمەتتىك جەلىلەر، فەيسبۋك ارقاسىندا ءبىر-ءبىرىن تاۋىپ الدى.
كۇپان اپانىڭ نەمەرەسى گۇلنار اپانىڭ قۇدابالاسىن فەيسبۋكتەن كەزدەيسوق كورىپ، گۇلنار اپانىڭ وتباسىمەن بايلانىسقا شىقتى. قوس بولە كورىسىپ، قۋانىشتان توبەلەرى كوككە جەتتى.
گۇلنار اپا ومىردەن ارمانىم جوق دەپ ءوتتى. ونىڭ ەسىمى ماڭگى ەستە قالادى..
اسقار دايىربەك،
«ادىرنا» ۇلتتىق پورتالى
