Qazaqtyń nar tulǵaly alyp jazýshysy, kemeńger Muhtar Áýezovtiń úıinde qyzyndaı ósken Gúlnar Razaqqyzy Omarhanova (Ázıeva) ómirden ótti.
Gúlnar apanyń ákesi Razaq - Muhtar Áýezovtiń aǵasy edi.
Anasy Ázimbaıqyzy Álıla - Qunanbaı qajynyń urpaǵy, Abaıdyń aǵasy Tákejannyń nemeresi edi.
Asyldyń synyǵy 1928 jyly Semeı óńirinde Abaı aýdanynda dúnıege keldi. Bala kezinde asharshylyq, qýǵyn-súrginniń dámin-tuzyn tatty.
Áýleti asharshylyq kezinde týǵan jerinen ketýge májbúr edi. Biraz qyrǵyz jerinde júrip, Qazaqstanǵa qaıtyp, Merkide turatyn boldy.
Kishkentaı Gúlnardy aǵasy Muhtar Áýezov alyp qyzyndaı Almatyda óz úıinde ósirdi.
Gúlnar apa soǵys kezinde Áýezovtiń páterinde orys jazýshysy Paýstovskııdyń turǵanyn esine jaqsy saqtady.
1955 jyly Gúlnar Omarhanova Qaraǵandy qalasynyń medıınalyq ınstıtýtyn támamdaǵan.
Jarty ǵasyrǵa jaqyn Gúlnar apa Qaraǵandy oblystyq aýrýhanasynda kóz dárigeri bolyp jumys istedi. Oǵan qosa, ózi bitirgen ınstıtýtynyń oftalmologııa kafedrasynda sabaq bergen.
Gúlnar apa myńdaǵan adamnyń kózine ota jasap, qos janaryn soqyrlyqtan saqtaǵan, álemniń kórkin kórýiniń qabiletin qaıtarǵan. Ol otalardy qalalarda ǵana emes, shalǵaıdaǵy aýyldarda, malshy qystaqtarda ótkizgen. Keıde otalar túnge sheıin sozylyp kóliktiń faralarynyń jaryǵynda ótetin edi.
Myńdaǵan shákirtteriniń alǵysy sheksiz. Olar Qazaqstanda ǵana emes, shetelde jumys isteıdi.
Gúlnar apa - "Eńbek ardageri", "Soǵys ardageri", " Tyń ıgerý úshin" tósbelgisiniń ıegeri, "Densaýlyq saqtaý isiniń úzdigi", Qazaqstannyń eńbek sińirgen dárigeri sııaqty marapattarynyń ıegeri.
Ákesindeı kórgen Muhtar Áýezov týraly
"Muhtar aǵa" kitabynyń avtory, ony kemeńgerdiń 100 jyldyǵyna arnap shyǵarǵan.
Ómirlik jary Ámen Ázıev - belgi tilshi, qalamger, redaktor, jazýshy edi. Qaraǵandy oblystyq gazetiniń redaktory bolyp birneshe jyl istegen.
Ekeýi Leıla atty qyzyn, Eldos atty ulyn ósirgen. Leıla - medıına salasynda ǵylymdar kandıdaty bolsa, Eldos - tehnıkalyq ǵylymynyń kandıdaty. Artynda tórt nemere, tórt shóbere qaldy, Dına atty nemeresi AQShtyń Chıkago qalasynda ómir súredi. Gúlnar apanyń armany - jarty ǵasyr buryn aıyrylysyp, sodan beri kórispegen Kúpán esimdi bólesin taýyp bir kórý edi. Bul armany byltyr kúzde oryndaldy. Qunanbaı áýletiniń jıenderi, eki bóle, eki toqsannan asyp ketken áje Abaıdyń 175 jyldyǵynyń qarsańynda ǵalamtor, áleýmettik jeliler, Feısbýk arqasynda bir-birin taýyp aldy.
Kúpán apanyń nemeresi Gúlnar apanyń qudabalasyn Feısbýkten kezdeısoq kórip, Gúlnar apanyń otbasymen baılanysqa shyqty. Qos bóle kórisip, qýanyshtan tóbeleri kókke jetti.
Gúlnar apa ómirden armanym joq dep ótti. Onyń esimi máńgi este qalady..
Asqar DAIYRBEK,
«Adyrna» ulttyq portaly
