الماتى وبلىسىندا 36 جاستاعى اۋىل تۇرعىنى تۋىسىن پىشاقتاپ ءولتىردى، دەپ حابارلايدى Polisia.kz.
6 ناۋرىز ساعات 22:15 شاماسىندا قاراساي اۋداندىق پوليتسيا ءبولىمىنىڭ كەزەكشى بولىمىنە ايتەي اۋلىنىڭ كوشەسىندە زورلىق-زومبىلىق بەلگىلەرى بار ەر ادام ءمايىتى تابىلعانى تۋرالى حابارلاما ءتۇستى. اتالعان جايت قىلمىستىق كودەكستىڭ 99-بابى ("ادام ءولتىرۋ") بويىنشا سوتقا دەيىنگى تەرگەۋدىڭ بىرىڭعاي تىزىمىنە تىركەلدى.
جەدەل-تەرگەۋ توبى ءمايىت تابىلعان جەرگە باردى. ەر ادامعا پىشاق سۇعىلعانىن انىقتادى. مارقۇمنىڭ جەكە باسى انىقتالدى، ول سول اۋىلدىڭ 37 جاستاعى تۇرعىنى بولىپ شىقتى. ول ايەلىمەن بىرگە قايىن ەنەسىنىڭ ۇيىندە تۇرعان.
تەرگەۋشىلەر قىلمىسقا قاتىسى بار دەگەن كۇدىكپەن 36 جاستاعى جەرگىلىكتى تۇرعىندى ۇستادى. ول – مارقۇمنىڭ قايىن اعاسى.
ونىڭ بۇعان دەيىن قىلمىستىق ىسكە قاتىسى بولعانى انىقتالدى. پوليتسيا دالەلدەردى كەلتىرگەن سوڭ ول قىلمىس جاساعانىن مويىندادى. ايتۋىنشا، بىرگە ىشىمدىك ىشكەن سوڭ جەر ۋچاسكەسىنە بايلانىستى سوزگە كەلىپ قالعان. سودان كەيىن كوشەدە اس ءۇي پىشاعىن جۇرەگىنە سۇعىپ العان.
قازىر كۇدىكتى ۋاقىتشا ۇستاۋ يزولياتورىنا قامالدى. وعان كۇزەتپەن ۇستاۋ تۇرىندەگى بۇلتارتپاۋ شاراسىن تاڭداۋ تۋرالى ماسەلە شەشىلىپ جاتىر.
