قىزىلوردا وبلىسىندا بانكەت زالدارىنا اس بەرۋگە رۇقسات بەرىلدى. وبلىستىڭ باس مەملەكەتتىك سانيتاريالىق دارىگەرىنىڭ جاڭا قاۋلىسىندا زالدا ادام سانى 50-دەن، ال تولىمدىعى 30 پايىزدان اسپاۋى قاجەتتىگى كورسەتىلگەن، دەپ حابارلايدى “ادىرنا” ۇلتتىق پورتالى Nege.kz سايتىنا سىلتەمە جاساپ.
جاڭا قاۋلىدا مەكتەپكە دەيىنگى مەكەمەلەردىڭ جۇمىسىنا بەلگىلەنگەن تالاپتاردى ورىنداعان جاعدايدا عانا رۇقسات بەرىلىپ وتىر. دەگەنمەن، توپتاردى بىرىكتىرىپ ءىس-شارالار وتكىزۋگە رۇقسات جوق. سونداي-اق، اتا-انالاردى جانە ەرىپ جۇرەتىن ادامداردىڭ عيماراتقا كىرۋىنە رۇقسات بەرىلمەيدى.
ال، جالپى ءبىلىم بەرەتىن مەكەمەلەردە مەكتەپالدى سىنىپتار، 1-5-ءىنشى سىنىپتار، حالىقارالىق مەكتەپتەردە 1-7-سىنىپتار، وقۋشىلار سانى 25-كە دەيىنگى وزگە سىنىپتاردى ارالاس فورماتتا وقىتۋعا رۇقسات بەرىلدى. «قازىرگى تاڭدا ءبىزدىڭ وبلىس «جاسىل» ايماقتا تۇر. وسىعان وراي جاڭا قاۋلىدا ايماقتاعى كارانتين تالاپتارى جەڭىلدەتىلگەن.
دەگەنمەن، بىرقاتار شەكتەۋلەر ءالى دە بار. ماسەلەن، ويىن-ساۋىق ءىس-شارالارىن، كورمەلەردى، فورۋمداردى، كونفەرەنتسيالاردى وتكىزۋگە تىيىم سالىنعان.
سونداي-اق، وتباسىلىق، سالتاناتتى، ەستەلىك ءىس-شارالاردى (بانكەتتەر، ۇيلەنۋ تويلارى، مەرەيتويلار) ۇيىمداستىرۋعا بولمايدى. ياعني، ۇيدە جانە ادامدار كوپ جينالاتىن وزگە دە شارالاردى وتكىزۋگە، بۋكمەكەرلىك كەڭسەلەردىڭ، بالالاردى ساۋىقتىرۋ لاگەرلەرىنىڭ قىزمەتىنە تىيىم جالعاسادى. مەرەكەلىك كورپوراتيۆتەردى ۇيىمداستىرۋ مەن وتكىزۋگە دە وسىنداي شەكتەۋ بار»، – دەدى وبلىستىڭ باس مەملەكەتتىك سانيتاريالىق دارىگەرى دينارا جاڭابەرگەنوۆا.
