دەپۋتات امانجان جامالوۆ ءماجىلىستىڭ جالپى وتىرىسىندا الەۋمەتتىك مەديتسينالىق ساقتاندىرۋ قورىنىڭ اكىمشىلىك شىعىستارى تۋرالى مالىمەتپەن ءبولىستى، دەپ حابارلايدى «ادىرنا» ءتىلشىسى «Qazaqstan» ۇلتتىق ارناسىنا سىلتەمە جاساپ.
«قازىر بيۋدجەتتەن تىس قورلاردىڭ شىعىندارى پارلامەنت پەن ەسەپ كوميتەتىنىڭ باقىلاۋىنان تىس قالىپ وتىر. ماسەلەن، 2019 جىلى الەۋمەتتىك مەديتسينالىق ساقتاندىرۋ قورىنىڭ اكىمشىلىك شىعىستارى 5,8 ملرد تەڭگەدەن اسقان. جالاقى تولەۋگە 4,4 ملرد تەڭگە جۇمسالعان. ەگەر قوردىڭ بارلىق 850 قىزمەتكەرىنە بولسەك، ارقايسىسىنا ايىنا 434 مىڭ تەڭگەدەن كەلەدى. بۇل ەلدەگى ورتاشا جالاقىدان ەكى ەسە جوعارى.
ەگەر امسق-نىڭ قولجەتىمدى قارجىلىق ەسەبىن زەرتتەيتىن بولساق، قور باسقارماسىنىڭ ءتورت مۇشەسىنە شامامەن 77 ملن تەڭگە سوماسىندا، ياعني ارقايسىسىنا 19 ملن تەڭگەدەن سىياقى تولەنگەن»، - دەدى دەپۋتات.
جامالوۆ مۇنداي شەكتەن تىس شىعىستارعا جول بەرىلمەۋ كەرەكتىگىن ايتىپ، ۇكىمەتكە دەپۋتاتتىق ساۋال جولدادى.
ول بيۋدجەتتەن تىس قورلاردىڭ شىعىستارى تۋرالى اقپارات بارىنشا اشىق بولۋ ءۇشىن ارنايى ستاندارتتار بەكىتىلۋ كەرەكتىگىن، وندا ەڭبەكاقى مەن اكىمشىلىك شىعىستاردىڭ بارلىق باپتارى انىق كورسەتىلۋى ءتيىس ەكەنىن ايتتى.
«ادىرنا» ۇلتتىق پورتالى
