Depýtat Amanjan Jamalov Májilistiń jalpy otyrysynda Áleýmettik medıınalyq saqtandyrý qorynyń ákimshilik shyǵystary týraly málimetpen bólisti, dep habarlaıdy «Adyrna» tilshisi «Qazaqstan» Ulttyq arnasyna silteme jasap.
«Qazir bıýdjetten tys qorlardyń shyǵyndary Parlament pen Esep komıtetiniń baqylaýynan tys qalyp otyr. Máselen, 2019 jyly Áleýmettik medıınalyq saqtandyrý qorynyń ákimshilik shyǵystary 5,8 mlrd teńgeden asqan. Jalaqy tóleýge 4,4 mlrd teńge jumsalǵan. Eger qordyń barlyq 850 qyzmetkerine bólsek, árqaısysyna aıyna 434 myń teńgeden keledi. Bul eldegi ortasha jalaqydan eki ese joǵary.
Eger ÁMSQ-nyń qoljetimdi qarjylyq esebin zertteıtin bolsaq, qor basqarmasynyń tórt múshesine shamamen 77 mln teńge somasynda, ıaǵnı árqaısysyna 19 mln teńgeden syıaqy tólengen», - dedi depýtat.
Jamalov mundaı shekten tys shyǵystarǵa jol berilmeý kerektigin aıtyp, Úkimetke depýtattyq saýal joldady.
Ol bıýdjetten tys qorlardyń shyǵystary týraly aqparat barynsha ashyq bolý úshin arnaıy standarttar bekitilý kerektigin, onda eńbekaqy men ákimshilik shyǵystardyń barlyq baptary anyq kórsetilýi tıis ekenin aıtty.
«Adyrna» ulttyq portaly
