تۇركىستان وبلىسى تولەبي اۋدانىندا ۇشەم دۇنيەگە كەلدى، دەپ حابارلايدى وبلىس اكىمىنىڭ ءباسپاسوز قىزمەتى.
لەڭگىر قالاسىنىڭ 36 جاستاعى تۇرعىنى اقەركە سەرگەباەۆا وبلىستىق №1 پەريناتالدى ورتالىعىندا ەكى قىز بەن ءبىر ۇل بوساندى.
تۇركىستان وبلىسى قوعامدىق دەنساۋلىق باسقارماسىنىڭ مالىمەتىنشە، وسىمەن وبلىستا جىل باسىنان بەرى ەكىنشى ۇشەم دۇنيەگە كەلدى. جاڭا تۋىلعان نارەستەلەرگە بالجان، ماعجان، توعجان ەسىمدەرى بەرىلدى.
مەرزىمىنەن ەرتە تۋعان ۇشەم پەرينيتالدىق ورتالىق دارىگەرلەرىنىڭ باقىلاۋىنا الىنعان. مەديتسينا قىزمەتكەرلەرىنىڭ كومەگىمەن سابيلەر سالماق قوسىپ، دەنساۋلىق جاعدايى جاقسارعان. ۇشەم پەرزەنتحانادان شىعۋعا ءازىر.
ۇشەم دۇنيە كەلگەن وتباسىنىڭ ءبىر ۇل مەن ءۇش قىزى بار. وتاعاسى دا، كوپبالالى انانىڭ ءوزى دە مەكتەپتە جۇمىس ىستەيدى.
«قورقىنىش بولدى، ارينە. اللانىڭ سىيىنا سانسىز شۇكىر. سابيلەرىمدى باعىپ، كۇتكەن دارىگەرلەرگە شەكسىز ريزامىن»، – دەيدى ۇشەمنىڭ اناسى.
جىل باسىنان بەرى تۇركىستان وبلىسىندا 10 مىڭنان استام ءسابي دۇنيەگە كەلدى.
