الپىس جاستاعى جارىلقاسىن امانوۆ «تەگىن تاكسي جۇرگىزۋشىسى» لاقاپ اتىمەن تانىمال. قايىرىمدى جان بۇگىندە ءبىراز ادامنىڭ العىسىن الىپ ۇلگەرگەن. «ادىرنا» ءتىلشىسى ەلوردا تۇرعىنىمەن اڭگىمەلەسىپ، سۇحبات قۇردى.
ۇيرەنشىكتى ادەتىمىزگە اينالدى
– "ازىرەت سۇلتان" مەشىتىندە 5 جىل ءىس باسقارۋشى بولىپ جۇمىس ىستەدىم. اكەمنىڭ ءوزى ساداقا بەرگەندى جاقسى كورەتىن. كارانتين كەزىندە ءبىراز حالىقتىڭ ازىق-تۇلىگى بولماي، قينالىپ قالدى. ءتىپتى قاراپايىم بەتپەردەنى تابا الماعاندارى دا بار. سونداي كەزەڭدە كەمپىرىم ەكەۋمىز اق داكەدەن بەتپەردە تىگىپ، از دا بولسا كومەگىمىزدى تيگىزۋگە تىرىستىق. كەيىننەن بالالارىمنىڭ جاردەمىمەن تەگىن نان تاراتتىق. وسىلايشا تەگىن كولىك جۇرگىزۋشىسى بولۋ يدەياسى دا دۇنيەگە كەلدى. قازىرگى تاڭدا قايىرىمدىلىق جاساۋ ءبىزدىڭ ۇيرەنشىكتى ادەتىمىزگە اينالىپ كەتتى.
ءنومىرىم تارالىپ كەتتى
– العاشقى كەزدە دالاعا شىعىپ، جاۋراپ تۇرعان ادامدارعا «تەگىن اپارىپ تاستايىن» دەگەن ۇسىنىستى ايتاتىنمىن. وزدەرىڭىز بىلەسىزدەر، قىز مەزگىلىندە ءبىر جاققا قاتىناۋ قيىن. كەيىننەن كورشى-قولاڭداردان ءنومىرىمدى تاراتۋدى ءوتىندىم. سودان ماعان قوڭىراۋلار تۇسە باستادى. كوبىنەسە ۇلكەن كىسىلەر، مۇمكىندىگى شەكتەۋلى جاندار، جالعىزباستى انالار كومەك سۇرايدى. قازىرگى تاڭدا بايلانىس ءنومىرىم ءتىپتى كەڭ تارالىپ كەتكەن. «پويىزدان جاڭا عانا ءتۇستىم، تاكسيگە اقشام بولماي تۇر» دەپ حابارلاساتىندار دا بار. مەن كۇن دەمەي، ءتۇن دەمەي وتىنىشتەرىن ورىنداۋعا تىرىسامىن. ەشقاشان كولىگىمە مىنگەن ادامنان اقشا المايمىن. كەيدە ورنىما بالالارىم بارادى.
تەگىن تاكسيدەن قورقادى
– 5-6 جىل تاكسي جۇرگىزۋشىسى بولدىم. وتباسىم رەنجىپ، «بۇل جۇمىسىڭدى قوي» دەۋشى ەدى. بۇگىندە بارلىعى ماعان ءدان ريزا. وزدەرى دە پالەنشە بار ەدى عوي، تۇگەنشە بار ەدى عوي دەپ كومەككە ءزارۋ جانداردى ايتىپ وتىرادى. ايەل ادامدار كوپ شاقىرعان كەزدە قاسىما كەمپىرىمدى ەرتە بارامىن. ول كىسى سول جاندارمەن تانىسىپ، ريزا بوپ قالادى. شىنى كەرەك، قازىر كوبى «تەگىن تاكسي» دەگەننەن قورقادى. «جامان ادام شىعار»، «ءبىر جاققا الداپ اپارىپ، ءولتىرىپ كەتەر» دەپ سەزىكتەنەدى. وسىنداي كۇدىكتەن ارىلتۋ ءۇشىن دە قاسىما جۇبايىمدى الىپ جۇرەمىن.
نەشە ءتۇرلى ادام جولىعادى
– نەگىزى كوپ كەشىكپەيتىن اداممىن، الايدا كەيدە بەس مينۋتقا بوگەلىپ قالاتىن ساتتەر بولادى. سونداي كەزدەردە اقىسىز اپاراتىنىمدى بىلە تۇرا «نەگە كەشىگىپ كەلدىڭ؟» دەگەن سىندى دورەكى سوزدەردى ايتاتىن ادامداردى جولىقتىردىم. مەن بۇنداي دۇنيەلەردىڭ بولارىن الدىن الا ءبىلىپ، دايىندالعان اداممىن. وتىرىك شاقىراتىندارى تاعى بار. جولدا كەزدەيسوق جولىعىپ، الىپ بارا جاتقان كەزىمدە «تەگىن بولسا بارمايمىن» دەپ ءتۇسىپ قالعاندار دا بولدى.
جۇمىسىم وزىمە ۇنايدى
– اركىمنىڭ وزىندىك ءحوببيى بار. ادام سۇيگەن ىسىمەن اينالىسسا، ەشقاشاندا شارشامايدى. قازىرگى جۇمىسىم وزىمە ۇنايدى. ادامدارمەن تىلدەسىپ، راحاتتانىپ قالامىن. ولارعا موتيۆاتسيا بەرۋگە تىرىسامىن.
اڭگىمەلەسكەن ديانا اسان،
«ادىرنا» ۇلتتىق پورتالى
