Alpys jastaǵy Jarylqasyn Amanov «tegin taksı júrgizýshisi» laqap atymen tanymal. Qaıyrymdy jan búginde biraz adamnyń alǵysyn alyp úlgergen. «Adyrna» tilshisi elorda turǵynymen áńgimelesip, suhbat qurdy.
Úırenshikti ádetimizge aınaldy
– "Áziret Sultan" meshitinde 5 jyl is basqarýshy bolyp jumys istedim. Ákemniń ózi sadaqa bergendi jaqsy kóretin. Karantın kezinde biraz halyqtyń azyq-túligi bolmaı, qınalyp qaldy. Tipti qarapaıym betperdeni taba almaǵandary da bar. Sondaı kezeńde kempirim ekeýmiz aq dákeden betperde tigip, az da bolsa kómegimizdi tıgizýge tyrystyq. Keıinnen balalarymnyń járdemimen tegin nan tarattyq. Osylaısha tegin kólik júrgizýshisi bolý ıdeıasy da dúnıege keldi. Qazirgi tańda qaıyrymdylyq jasaý bizdiń úırenshikti ádetimizge aınalyp ketti.
Nómirim taralyp ketti
– Alǵashqy kezde dalaǵa shyǵyp, jaýrap turǵan adamdarǵa «tegin aparyp tastaıyn» degen usynysty aıtatynmyn. Ózderińiz bilesizder, qyz mezgilinde bir jaqqa qatynaý qıyn. Keıinnen kórshi-qolańdardan nómirimdi taratýdy ótindim. Sodan maǵan qońyraýlar túse bastady. Kóbinese úlken kisiler, múmkindigi shekteýli jandar, jalǵyzbasty analar kómek suraıdy. Qazirgi tańda baılanys nómirim tipti keń taralyp ketken. «Poıyzdan jańa ǵana tústim, taksıge aqsham bolmaı tur» dep habarlasatyndar da bar. Men kún demeı, tún demeı ótinishterin oryndaýǵa tyrysamyn. Eshqashan kóligime mingen adamnan aqsha almaımyn. Keıde ornyma balalarym barady.
Tegin taksıden qorqady
– 5-6 jyl taksı júrgizýshisi boldym. Otbasym renjip, «bul jumysyńdy qoı» deýshi edi. Búginde barlyǵy maǵan dán rıza. Ózderi de pálenshe bar edi ǵoı, túgenshe bar edi ǵoı dep kómekke zárý jandardy aıtyp otyrady. Áıel adamdar kóp shaqyrǵan kezde qasyma kempirimdi erte baramyn. Ol kisi sol jandarmen tanysyp, rıza bop qalady. Shyny kerek, qazir kóbi «tegin taksı» degennen qorqady. «Jaman adam shyǵar», «bir jaqqa aldap aparyp, óltirip keter» dep seziktenedi. Osyndaı kúdikten aryltý úshin de qasyma jubaıymdy alyp júremin.
Neshe túrli adam jolyǵady
– Negizi kóp keshikpeıtin adammyn, alaıda keıde bes mınýtqa bógelip qalatyn sátter bolady. Sondaı kezderde aqysyz aparatynymdy bile tura «nege keshigip keldiń?» degen syndy dóreki sózderdi aıtatyn adamdardy jolyqtyrdym. Men bundaı dúnıelerdiń bolaryn aldyn ala bilip, daıyndalǵan adammyn. Ótirik shaqyratyndary taǵy bar. Jolda kezdeısoq jolyǵyp, alyp bara jatqan kezimde «tegin bolsa barmaımyn» dep túsip qalǵandar da boldy.
Jumysym ózime unaıdy
– Árkimniń ózindik hobbıi bar. Adam súıgen isimen aınalyssa, eshqashanda sharshamaıdy. Qazirgi jumysym ózime unaıdy. Adamdarmen tildesip, rahattanyp qalamyn. Olarǵa motıvaııa berýge tyrysamyn.
Áńgimelesken Dıana ASAN,
«Adyrna» ulttyq portaly
