9 وڭىردە داۋىل تۇرىپ، توتەنشە جاعداي ورىن الۋى مۇمكىن - تجم

3969
Adyrna.kz Telegram

بۇل تۋرالى قر توتەنشە جاعدايلار ءمينيسترى يۋري يلين ورتالىق كوممۋنيكاتسيالار قىزمەتىندە وتكەن بريفينگتە ايتتى، دەپ حابارلايدى "ادىرنا" ۇلتتىق پورتالى BAQ.kz سايتىنا سىلتەمە جاساپ. 

قىس كەزەڭىنىڭ باسىنان باستاپ رەسپۋبليكا بويىنشا 1 063 داۋىلدى ەسكەرتۋ جاريالاندى، رەسپۋبليكالىق جانە وبلىستىق ماڭىزى بار اۆتوجول ۋچاسكەلەرى 682 رەت جابىلدى، جۇك جانە جولاۋشى اۆتوكولىكتەرى ءۇشىن 233 رەت قوزعالىسقا شەكتەۋ ەنگىزىلدى.

"1 240-تان اسا ادام قۇتقارىلىپ، ەۆاكۋاتسيالاندى، 97 جىلىتۋ پۋنكتى جۇمىلدىرىلدى، 439 تەحنيكا قۇتقارىلدى. اۆاريالىق-قۇتقارۋ جۇمىستارىنا تجم، ءىىم، قازاۆتوجولدان جانە جەرگەلىكتى اتقارۋشى ورگانداردان 5 مىڭنان اسا ادام جانە 1 396 تەحنيكا جۇمىلدىرىلدى", - دەپ ايتتى مينيستر.

ونىڭ سوزىنشە، حالىقتى تج قاۋپى تۋرالى ەسكەرتۋ ماقساتىندا تۇرعىنداردىڭ ۇيالى تەلەفوندارىنا اۋا رايىنىڭ ناشارلاۋى تۋرالى sms-حابارلاما، سونداي-اق «دارمەن» موبيلدىك قوسىمشاسى ارقىلى دا حابارلاما جىبەرىلدى.

"قازىر ابونەنتتەر سانى ءوسىپ كەلەدى. وتكەن جىلدارمەن سالىستىرعاندا قار قۇرساۋىنا تۇسكەن كولىكتەر سانى ەداۋىر ازايدى. جەرگىلىكتى اتقارۋشى ورگاندار جولداردىڭ قوزعالىسىن شەكتەۋ بويىنشا ۇلكەن جۇمىستار اتقارىپ جاتىر. دەگەنمەن ايتىلعان فاكتىلەر بويىنشا بارلىق ادام بىردەي تج ەسكەرتۋىن ورىنداي بەرمەيدى. وسىنداي ۋاقىتتا قۇتقارۋشىلار جولدا قالعانداردى قۇتقارۋعا شىعادى", - دەيدى يلين.

تجم ءمينيسترى اتاپ وتكەندەي، وتكەن اپتادا اۋا رايى قۇبىلمادى بولدى. قازىرگى جاعداي بويىنشا قازگيدرومەت دەرەكتەرى بويىنشا 9 وڭىردە داۋىلدى ەسكەرتۋ جاريالاندى. ولار شىمكەنت، اقمولا، شقو، بقو، جامبىل، قاراعاندى، قوستانايع قىزىلوردا جانە تۇركىستان وبلىستارى.

"سونداي-اق، 3 ءوڭىر ۋچاسكەلەرىندە جولدار جابىق. قىس مەزگىلى كۇنتىزبە بويىنشا اياقتالدى. دەگەنمەن ورتالىق قازاقستانعا جاڭا تسيكلون جاقىنداپ كەلەدى. جەلدىڭ كۇشەيۋىنەن اتالعان وڭىرلەردە تج بولۋى مۇمكىن", - دەدى مينيستر يۋري يلين.

پىكىرلەر