قازاق مەملەكەتتىك تسيركىنىڭ شىعارماشىلىق ۇجىمى ەرەكشە مەرەكەلىك لازەرلىك شوۋ نەگىزىندە ازىرلەنگەن امادەي گوفماننىڭ «ششەلكۋنچيك جانە تىشقان پاتشاسى» ەرتەگىسىنىڭ جەلىسى بويىنشا 2016 جىلدىڭ 18 جەلتوقسانى مەن 2017 جىلدىڭ 8 قاڭتار ارالىعىندا وتەتىن «ششەلكۋنچيك تسيرك الاڭىندا» اتتى باعدارلاماسىنا ەرەسەكتەر مەن بالالاردى شاقىرادى.
17 جەلتوقسان كۇنى تاڭعاجايىپ ەرتەگىنىڭ جۋرناليستەرگە ارنالعان كورسەتىلىمى بولدى. سيقىرلى ەرتەگىنىڭ باستى كەيىپكەرلەرىنىڭ ءبىرى – ششەلكۋنچيك – ول ادەمى حانزادا، ول تىشقان پاتشالىعىنىڭ زۇلىم حانشايىمى مىشيلدانىڭ سيقىرىمەن اعاش قۋىرشاققا اينالدىرىلادى. ششەلكۋنچيك تىشقان پاتشاسىن جەڭگەندە عانا حانزادانىڭ سيقىرى جويىلىپ، ونى كەرەمەت سۇلۋقىز ماري ءسۇيىپ قالادى. بىراق، زۇلىم مىشيلدا قاراپ قالمايدى، ول ششەلكۋنچيكتى ۇرلاپ الىپ شايناپ تاستاماقشى بولادى. تەك قانا مۋرر اۋلەتى عانا تىشقانداردى قورقىتىپ، ششەلكۋنچيكتى قورعاي الادى. بۇل جاڭا جىلدىق قويىلىم جورامال مەن قۇپياعا تولى عاجايىپتى كۇتۋدە.
ەرتەگى كەيىپكەرلەرى دروسسەلمەيەر، ششەلكۋنچيك، ماري، فريتس، مىشيلدا، تىشقان پاتشاسى، اياز اتا، اقشاقار بولسا، ولارمەن قوسا، اۋە گيمناستارى، اكروباتتار، ەكۆيليبريستەر جانە ۇيرەتىلگەن جانۋارلار، كلوۋندار بالالارعا كوڭىلدى كەش سىيلاي ءبىلدى. ماسكەۋدەن اكەلىنگەن ۇلكەن كولەمدى لازەرلىك 3D شوۋى دا بالالارعا سيقىر الەمىنە ەنۋگە كوپ سەپتەستى. عاجايىپ قورىنىستەردى قازاق مەملەكەتتىك تسيركىنىڭ ايگىلى بالەت توبى – «فاراندول» سۇيەمەلدەپ وتىردى.
جاڭا باعدارلاما – تسيرك، تەاتر، مۋزىكا جانە حورەوگرافيالىق ونەرلەردىڭ ۇزدىك داستۇرلەرىنىڭ جينتىعى. رەجيسسەرلىك-قويىلىم توبىنىڭ الدىنا قويعان ماقساتى – تەك قانا كورەرمەننىڭ كوڭىل-كۇيىن كوتەرۋ عانا ەمەس، سونىمەن قاتار، بۇل قويىلىمنان كورەرمەننىڭ وزىنە الار ءبىلىمى مەن تاربيەلىك ءمانى دە وراسان زور. تسيرك ونەرىنىڭ كىشكەنتاي اۋەسقويلارى پ. ي. چايكوۆسكيدىڭ اتاقتى بالەتى «ششەلكۋنچيك» مۋزىكاسىن دا تاماشالادى. ارنايى وسى باعدارلاماعا ارناپ، جاڭا تسيركتىك نومەرلەر قويىلدى، ارناۋلى مۋزىكا جازىلدى، جاڭا كوستيۋمدەر تىگىلىپ، رەكۆيزيتتار دايىندالدى. بۇل تسيركتىك جوبا كەز كەلگەن جاستاعى الۋان ءتۇرلى كورەرمەندەرگە ارنالادى. سىزدەردى سيقىرلى الەم مەن تاڭعاجايىپ كورىنىستەر ءتانتتى ەتەرى ءسوزسىز!
باقىت بوكەباەۆ، قازاق مەملەكەتتىك تسيركىنىڭ ديرەكتورى:
- قازاق مەملەكەتتىك تسيركىنىڭ تاريحىنا قاراپ وتىرساق، بۇل تسيركتە ءتول تۋىندىلار وتە سيرەك قويىلعان ەكەن. سول ولقىلىقتىڭ ورنىن تولتىرۋ ماقساتىندا جاڭا جىل مەرەكەسى قارساڭىندا امادەي گوفماننىڭ «ششەلكۋنچيك جانە تىشقان پاتشاسى» ەرتەگىسىنىڭ جەلىسى بويىنشا «ششەلكۋنچيك – تسيرك الاڭىندا» اتتى قويىلىم قويىپ وتىرمىز. ارمەن قاراي دا ءبىز بۇل باعىتتا جۇيەلى جۇمىستار جۇرگىزەتىن بولامىز. كوكتەمدە ۇلىستىڭ ۇلى كۇنى – ناۋرىز مەرەكەسى قارساڭىندا قازاق ەرتەگىسى نەگىزىندە قويىلىم قويۋدى ويلاپ وتىرمىز. بىراق، ءالى جوبا جان-جاقتى ويلاستىرىلۋدا.
ارمان سەرىكۇلى
