كەنەتتەن بولاتىن نارەستە ءولىمى سيندرومىن بۇرىن سوڭدى ەستىدىڭىز بە؟ جاڭا تۋعان 10 مىڭ نارەستەنىڭ تورتەۋى ءدال وسى سيندرومعا شالدىعادى ەكەن. بۇل قاۋىپتى سيندرومنىڭ الدىن الۋ ءۇشىن ۇسىنىلاتىن كەڭەستەرگە ءمان بەرەيىك.
«كەنەتتەن بولاتىن نارەستە ءولىمى» سيندرومى ءبىر جاسقا دەيىنگى بالالاردىڭ تىنىس الۋ مۇشەسىنىڭ اۆتوماتتى تۇردە توقتاپ قالۋىمەن بايلانىستى. كوبىنە، بالا ءتاتتى ۇيقىدا جاتقاندا ورىن الادى. «سمەرت ۆ كولىبەلي» دەگەن اتاۋ دا وسىدان شىققان. سيندروم دياگنوزى بالا ءمايىتىن تەكسەرىستەن وتكىزگەننەن كەيىن بارىپ قويىلادى. تۋعانىنان جۇرەك اقاۋى، ءىش قۇرىلىسىنداعى ءتۇرلى ينفەكتسيالارى بار بالالار دا ءدال وسى سيندرومعا شالدىعىپ جاتادى.
كبنو سيندرومىنا ناقتى نە نارسە اسەر ەتەتىنى ءالى دە انىقتالعان جوق. تەكسەرىس كەزىندە سيندرومعا شالدىققان بالالاردان گيپوكسيا بەلگىلەرى بايقالادى – ورگانيزمدە نەمەسە جەكە مۇشەلەردە وتتەگى مولشەرى از.
عالىمدار كبنو تۋدىرۋى مۇمكىن سەبەپتىڭ ەكى تۇرىنە باسا نازار اۋدارادى:
ءبىرىنشى توپ – تۋا بىتكەن ەرەكشەلىكتەرى بار سابيلەر. سالماعى از نەمەسە مەرزىمىنەن بۇرىن تۋعان نارەستەلەر. تولىققاندى توعىز اي بويى جەتىلىپ تۋاتىن بالالارعا قاراعاندا بۇل سيندروم 6-7 ايىندا تۋعان بالالارعا وتە قاتتى اسەر ەتەدى.
ەكىنشى توپ – سىرتقى ورتانىڭ كەسىرى. انالار ءسابيىن ەمىزىپ وتىرعاندا ولاردىڭ تىنىس مۇشەسىن بىتەپ تاستاۋى مۇمكىن. اسىرەسە مۇنداي جاعدايلار ءتۇن ۋاقىتىندا كوپ كەزدەسەدى. ءۇي جانۋارلارىنىڭ دا سابيگە تيگىزەتىن زيانى بار. اسىرەسە مىسىقتى جولاتپاڭىز. ولار وتە سەزىمتال. ءسابيدىڭ جانىنا كەلىپ ۇيىقتاعاندا ۇناتادى. كەنەتتەن بولاتىن نارەستە ولىمىنە سىرتقى ورتانىڭ اسەرى دە بار. بىراق 55% تۋا بىتكەن دەنساۋلىق اقاۋىنا بايلانىستى.
اقش پەن يتاليادا كبنو سيندرومىنان جاڭا تۋعان 10 مىڭ ءسابيدىڭ 10-ى قايتىس بولادى ەكەن. رەسەي، شۆەتسيا جانە ءبىزدىڭ ەلدە قۋانىشقا وراي كورسەتكىش وتە از.
بالانىڭ بۇل سيندرومعا شالدىعۋىنا:
جاسقا تولماعان، سۇيەكتەرى قاتايماعان سابيلەردىڭ دۇرىس جاتپاۋى
سۋىق ءتيىپ اۋىرۋى – بالانىڭ تىنىس الۋ مۇشەسىنە كەدەرگى بولادى
سالماعى از، شالا تۋعان سابيلەردىڭ مي جۇيەسىنىڭ قالىپتى دامىماۋى
ۇيدە شىلىم شەگەتىن ادامنىڭ بولۋى – ءيىسى تۇنشىقتىرۋى مۇمكىن
انادان كەلەتىن قاۋىپ:
جۇكتى كەزىندە شىلىم شەگۋ
ەسىرتكى مەن الكوگولدى قولدانۋ
ەرتە جاستاعى جۇكتىلىك (16-18)
نەراستە شىر ەتىپ دۇنيەگە كەلگەن ساتتەن باستاپ، ونىڭ جەتىلۋىنە اتا-انا بار امالدى جاساۋ كەرەك. اسىرەسە، ءتىلى شىعىپ، جۇرە باستاعان كەزگە دەيىن وتە كوپ كۇتىم كەرەك. «ءتۇن ۇيقىسىن ءتورت بولگەن» دەگەن ادەمى ءسوز بار. ەندەشە، بار تامىرىن ءيدىرىپ، تۋعان ءسابيىنىڭ تۇنگى ۇيقىسىنىڭ دۇرىس بولۋىنا دا اسا قاتتى ءمان بەرۋ كەرەك. كبنو وتە قاۋىپتى، سيرەك كەزدەسەتىن سيندروم.
ءىنجۋ ومىرزاق
