بۇگىن – شۇرايلى جىردان وشپەس مۇرا قالدىرعان ءدۇلدۇل اقىن، جىراۋ، جامبىل جاباەۆتىڭ تۋعان كۇنى. ول 1846 جىلعى اقپان ايىنىڭ 28-ءى كۇنى جامبىل وبلىسىنداعى جامبىل تاۋىنىڭ ەتەگىندە دۇنيەگە كەلگەن. ۇلى ءجۇز شاپىراشتى تايپاسىنىڭ ىشىندەگى ەكەي رۋىنان شىققان.
جامبىل - ءارى ەپيك، ءارى ايتىس اقىنى، ابىز جىراۋ ءhام جاۋىنگەر جىرشى. ول شىن ماعىناسىنداعى بيىك پاراساتتى ونەرپاز، ازاماتتىق ساياسي پوەزيانى قالىپتاستىرۋشى.
جاستايىنان اقىندىق ونەرگە قۇمارتقان جامبىل 14 جاسىندا جىردىڭ ءپىرى ءسۇيىنباي اقىننان باتا الىپ، ءسوز ونەرىنىڭ داڭعىل جولىنا تۇسەدى.
جامبىلدىڭ ۇلىلىعى ونىڭ تەك اقىندىق شەبەرلىگىمەن عانا ەمەس، سونىمەن بىرگە حالىق پوەزياسىنىڭ بۇتاق جايعان جاڭا ءبىر بايتەرەگى بولۋىمەن، باسقاشا ايتقاندا ، حالىق اقىندارىنىڭ جاسامپازدىق رۋحتاعى جاڭا ۇلى كوشىن باستاعان دارالىعىمەن دە ولشەنەدى. ونىڭ سوزدەرى ۇرانعا اينالىپ، ءوزى حالىق پوەزياسىنىڭ اتاسى اتالدى. ول جىراۋلاردىڭ بايتاق ەپيكالىق ءداستۇرىن، قازاق ءسوز ونەرىندەگى عاجايىپ يمپروۆيزاتسيالىق ءۇردىستى بۇتىندەي جاڭا ارناعا بۇرىپ، وعان جاڭا مازمۇن دارىتتى.
نازارلارىڭىزعا اقىننىڭ ناقىل سوزدەرىن ۇسىنامىز.
ەلدىڭ سەرتى — ەر سەرتى.
اقىن عارىپ ەمەس پە،
بايدى وتىرىك ماقتاسا.
زامان عارىپ ەمەس پە،
ادىلەتتەن اتتاسا.
جامانعا ۇيقى – جولداس، تامىر – تاماق، بولمايدى كوڭىلىندە باسقا تالاپ.
شەشەن كىسى ءسوز باستار،
ادال كىسى – ەل باستار.
ءان — حالىق ءۇنى، ونىڭ شىندىعى، ونىڭ ويى مەن سەزىمى
ەتكەن ەڭبەك، توككەن تەر
قالاي تۇككە تاتىماس؟!
قورقاق ادام قور بولار،
كولەڭكەدەن قورعالار.
گۇلفايرۋز مىقتىبەكوۆا،
الماتى قالاسىنا قاراستى
الاتاۋ اۋدانىنىڭ 182 جالپى ءبىلىم بەرەتىن مەكتەپتىڭ مۇعالىمى
