«اق جول» پارتياسى اكىمدىكتەر بەرگەن الەۋمەتتىك تۇرعىن ۇيلەرگە مۇقيات تەكسەرۋ جۇرگىزۋدى تالاپ ەتەدى. بۇل تۋرالى بۇگىن فراكتسيا دەپۋتاتى ەرلىك ومىرعالي دەپۋتاتتىق ساۋالىندا مالىمدەدى، دەپ حابارلايدى «ادىرنا» ءتىلشىسى پارتيانىڭ ءباسپاسوز قىزمەتىنە سىلتەمە جاساپ.
قر پرەمەر-ءمينيسترى
ا.ۇ.مامينگە
مەملەكەت باسشىسى قازاقستان حالقىنا جولداۋىندا ازاماتتاردىڭ الەۋمەتتىك ءال-اۋقاتى، ەڭ الدىمەن، تۇرعىن ءۇي ماسەلەسىمەن تىعىز بايلانىستى ەكەنىن اتاپ ءوتتى. تابىسى تۇرعىن ءۇي ماسەلەلەرىن ءوز بەتىنشە شەشۋ ءۇشىن جەتكىلىكسىز ازاماتتارعا ءتيىمدى الەۋمەتتىك قولداۋ كورسەتىلەتىن بولادى. كەزەكتە تۇرعانداردىڭ تۇرعىن ءۇي پروبلەمالارىن نەعۇرلىم جەدەل شەشۋ قاجەت.
حالىقتىڭ الەۋمەتتىك وسال توپتارىن، كوپ بالالى وتباسىلاردى، مەملەكەتتىك قىزمەتكەرلەردى جانە باسقا دا ساناتتاعى ازاماتتاردى تۇرعىن ۇيمەن قامتاماسىز ەتۋ ماقساتىندا قازاقستان رەسپۋبليكاسىنىڭ ۇكىمەتى بىرنەشە باعىت بويىنشا تۇرعىن ۇيمەن قامتاماسىز ەتۋ جونىندەگى مەملەكەتتىك باعدارلامالاردى ازىرلەپ، بەكىتتى.
الايدا، ءبىز كورىپ وتىرعانىمىزداي، شەنەۋنىكتەر وزدەرىنىڭ قىزمەتتىك وكىلەتتىكتەرىن پايدالانا وتىرىپ، "نۇرلى جەر" مەملەكەتتىك باعدارلاماسى بويىنشا تۇرعىن ءۇي الۋعا ء"وز ادامدارىن" زاڭسىز كەزەككە قويادى. سونداي-اق جالعا بەرىلەتىن تۇرعىن ۇيگە مۇقتاج ەمەس ادامدارعا باسىمدىق بەرە وتىرىپ، مەملەكەتتىك تۇرعىن ءۇيدى بولەدى. وسىنداي ءىس-ارەكەتتەردىڭ ناتيجەسىندە ءۇش مىڭنان استام ازامات مۇقتاج ادامدار تىزىمىنە ەنگىزىلدى، وسىلايشا مۇگەدەكتەر، كوپبالالى وتباسىلار جانە جۇمىس ىستەيتىن جاستار سياقتى شىنىمەن مۇقتاج ادامداردىڭ قۇقىقتارىنا نۇقسان كەلتىردى.
ماسەلەن، سوڭعى ءۇش جىلدىڭ ىشىندە "نۇرلى جەر" مەملەكەتتىك باعدارلاماسىن ىسكە اسىرۋ كەزىندە قازاقستان رەسپۋبليكاسىنىڭ وڭىرلەرىندە شەنەۋنىكتەردىڭ تۇرعىن ءۇيدى زاڭسىز بەرگەن 400-دەن استام فاكتى انىقتالدى، اتاپ ايتقاندا قاراعاندى (128), ماڭعىستاۋ (53), باتىس قازاقستان (38), تۇركىستان (35), پاۆلودار (30) وبلىستارىندا، الماتى قالاسىندا (23), شىعىس قازاقستان (21), جامبىل (14), اقمولا (11), سولتۇستىك (2), قوستاناي وبلىستارىندا (11), شىمكەنت (11), نۇر-سۇلتان (1), الماتى (15) قالالارىندا.
"تۇرعىن ءۇي قاتىناستارى تۋرالى" قازاقستان رەسپۋبليكاسى زاڭىنىڭ 71-بابىنىڭ 5-تارماعىنا سايكەس اۋدانداردىڭ، وبلىستىق ماڭىزى بار قالالاردىڭ، رەسپۋبليكالىق ماڭىزى بار قالالاردىڭ، استانانىڭ جەرگىلىكتى اتقارۋشى ورگاندارى كوممۋنالدىق تۇرعىن ءۇي قورىنان تۇرعىن ۇيگە مۇقتاجدار ەسەبىندە تۇرعان قازاقستان رەسپۋبليكاسى ازاماتتارىنىڭ تىزىمدەرىنە، ونىڭ ىشىندە مەملەكەتتىك تۇرعىن ءۇي قورىنان تۇرعىن ۇيگە نەمەسە جەكە تۇرعىن ءۇي قورىنان جەرگىلىكتى اتقارۋشى ورگان جالداعان تۇرعىن ۇيگە مۇقتاج ازاماتتاردى ەسەپكە قويۋدىڭ جانە كەزەكتىلىكتىڭ ەلەكتروندىق بازاسىن پايدالانا وتىرىپ، جىل سايىن تۇگەندەۋ جۇرگىزەدى.
الايدا، قالالار مەن وبلىستاردىڭ اكىمدىكتەرى زاڭنىڭ بۇل تالابىن ورىندامايدى، ۇيگە مۇقتاج 13 000-نان استام ازامات ءالى كۇنگە تىزىمدە تۇر: شىعىس قازاقستان - 4091, قاراعاندى - 2540, باتىس قازاقستان - 1781, ماڭعىستاۋ - 1606, پاۆلودار - 1294, نۇر-سۇلتان قالاسى – 351, قىزىلوردا - 348, الماتى قالاسى - 254, اقمولا - 244, سولتۇستىك قازاقستان-64, قوستاناي - 51, الماتى - 18, شىمكەنت قالاسى - 7.
سونداي-اق، 13 ءوڭىردىڭ اكىمدىكتەرى زاڭنىڭ 74-بابىنىڭ ەرەجەلەرىندە بەلگىلەنگەن تۇرعىن ءۇي بەرۋ كەزەكتىلىگىن، ونىڭ ىشىندە جەتىم بالالارعا تۇرعىن ءۇي بەرۋ سانىنىڭ ءنورماتيۆى بويىنشا بۇزۋشىلىقتارعا جول بەردى.
ناتيجەسىندە حالىقتىڭ الەۋمەتتىك وسال توپتارىنان 2320 ادامنىڭ، ونىڭ ىشىندە 1206 جەتىم بالانىڭ (الماتى - 766, الماتى ق. - 619, نۇر-سۇلتان ق.- 314, قوستاناي - 223, شىمكەنت ق. - 156, باتىس قازاقستان - 136, اقمولا - 34, جامبىل - 19, تۇركىستان - 18, سولتۇستىك قازاقستان - 15, قاراعاندى - 11, قىزىلوردا-5, اتىراۋ - 4) تۇرعىن ءۇي الۋ قۇقىعىنا ورەسكەل نۇقسان كەلتىرىلگەن.
تۇرعىن ءۇي قاتىناستارى سالاسىنداعى كەلتىرىلگەن جاپپاي بۇزۋشىلىقتار تەك انىقتالعان فاكتىلەر عانا، ال قازاقستان رەسپۋبليكاسىندا مۇنداي انىقتالماعان قانشا فاكت بار ەكەنىن تەك ەلەستەتەى الامىز.
"اق جول" پارتياسىنىڭ سايلاۋالدى باعدارلاماسىندا الەۋمەتتىك تۇرعىن ءۇيدى ءادىل ءبولۋ ماسەلەسى كورىنىس تاپقانىن اتاپ وتكىمىز كەلەدى. ويتكەنى فراكتسياعا تۇراقتى نەگىزدە ازاماتتاردان تۇرعىن ءۇيدى ادىلەتسىز بولۋگە، سونداي-اق تۇرعىن ءۇي الۋدا كەزەكتىلىكتىڭ اقىرىن كەلۋى بويىنشا شاعىمدار كەلىپ تۇسۋدە.
وسىعان بايلانىستى مۇددەلى مەملەكەتتىك ورگاندار تاراپىنان وسىنداي فاكتىلەرگە جول بەرمەۋ ءۇشىن مىناداي شارالار قابىلداۋ قاجەت دەپ سانايمىز:
- وسىنداي فاكتىلەردى انىقتاۋ ءۇشىن سوڭعى 5 جىلدا جەرگىلىكتى اتقارۋشى ورگاندار بەرگەن الەۋمەتتىك تۇرعىن ۇيگە مۇقيات تەكسەرۋ جۇرگىزۋ، زاڭسىز بەرىلگەنى انىقتالعان جاعدايدا تۇرعىن ۇيگە شىنىمەن مۇقتاج ازاماتتارعا تۇرعىن ءۇيدى بەرۋ بويىنشا شۇعىل شارالار قابىلداۋ;
- مەملەكەتتىك باعدارلاما بويىنشا تۇرعىن ءۇي الۋ ءۇشىن كەزەككە زاڭسىز تۇرۋ فاكتىلەرىن انىقتاۋ بويىنشا تەكسەرۋ جۇرگىزۋ، بۇزۋشىلىقتار انىقتالعان جاعدايدا مۇنداي تۇلعالاردى الىپ تاستاۋ بويىنشا شارالار قابىلداۋ.
سونداي-اق، تۇرعىن ءۇي ساياساتىن جەرگىلىكتى اتقارۋشى ورگانداردان "وتباسى بانككە" بەرۋ تۋرالى شەشىمدى "اق جول" دەپۋتاتتىق فراكتسياسى تولىق قولدايتىنىن جانە قۇپتايتىنىن اتاپ وتكىمىز كەلەدى.
قۇرمەتپەن،
"اق جول" فراكتسياسىنىڭ دەپۋتاتتارى
