قاراعاندى قالاسىنىڭ تۇرعىنى 17 ملن 500 تەڭگە كولەمىندەگى اقشاسىن كورشىسىنە ساقتاپ قويۋ ءۇشىن بەرىپ، اقشانىڭ جوعالعانى تۋرالى پوليتسياعا شاعىمدانعان، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
18 اقپان كۇنى قاراعاندى قالالىق پوليتسيا باسقارماسىنا قاراستى ورتالىق پوليتسيا بولىمىنە 64 جاستاعى قالا تۇرعىنى حابارلاسقان. جابىرلەنۋشى ازاماتشا پوليتسيا قىزمەتكەرلەرىنە بىرنەشە كۇن اۋرۋحانادا جاتقانىن ايتقان. بەلگىلەنگەن ەمدەۋ شارالارىن الىپ ۇيىنە كەلگەن زەينەتكەر ءوزىنىڭ ۇيىندە بەلگىسىز ۇرىلاردىڭ بولعانىن حابارلاعان.
جابىرلەنۋشىنىڭ ايتۋىنشا، بەلگىسىز بىرەۋلەر كىلت تاڭداۋ ارقىلى ونىڭ ۇيىنە كىرىپ، 5 ميلليون تەڭگە جانە 30 مىڭ اقش دوللارىن الىپ كەتكەن. جابىرلەنۋشىگە كەلتىرىلگەن شىعىن كولەمى 17 ميلليون 500 مىڭ تەڭگەنى قۇراعان.
اتالعان فاكت بويىنشا قازاقستان رەسپۋبليكاسى قىلمىستىق كودەكسىنىڭ 188-بابىمەن (ۇرلىق) قىلمىستىق ءىس قوزعالدى. پوليتسيا قىزمەتكەرلەرى ءمان-جايدى انىقتاۋ بارىسىندا جابىرلەنۋشى ازاماتشا ءوزىنىڭ جيعان اقشاسىن اۋرۋحاناعا جاتار الدىندا ۋاقىتشا ساقتاي تۇرۋ ءۇشىن كورشىسىنە قالدىرعانىن ەسىنە ءتۇسىردى.
ايتا كەتۋ كەرەك، كورشىسى زەينەتكەردىڭ بارلىق اقشاسىن وزىنە قايتارىپ بەردى.
«ادىرنا» ۇلتتىق پورتالى
