الماتى تۇرعىنى 11 جىل بويى العان 12 ملن تەڭگە زەينەتاقىسىن مەملەكەتكە قايتارۋى كەرەك، دەپ حابارلايدى “ادىرنا” ۇلتتىق پورتالى.
مۇنداي شەشىمدى جۋىردا قالانىڭ تۇركسىب اۋداندىق سوتى شىعاردى.
بەلگىلى بولعانداي، 2010 جىلدىڭ 1 تامىزىندا الماتى قالاسىنىڭ تۇرعىنىنا زەينەتكەرلىك جاسقا تولۋىنا بايلانىستى زەينەتاقى تولەمدەرى تاعايىندالعان.
سول جىلدىڭ 10 اقپانىندا ايەل شەشەنستان رەسپۋبليكاسىنىڭ احماتوۆ اۋدانىندا دا زەينەتاقى الا باستاعان. وسىلايشا ول ەكى ەلدە قاتار زەينەتاقى الىپ جۇرگەن، بۇل قازاقستان زاڭناماسىن بۇزۋ بولىپ تابىلادى.
سوت وتىرىسىندا زەينەتكەر قر ەڭبەك جانە حالىقتى الەۋمەتتىك قورعاۋ مينيسترلىگىنىڭ وزىنە قويعان تالابىن مويىندادى. سوت شەشىمى بويىنشا ول ەندى بيۋدجەتكە 12 318 134 تەڭگە – 2010 جىلدىڭ تامىزىنان 2021 جىلدىڭ قىركۇيەگىنە دەيىن زاڭسىز العان زەينەتاقىسىنىڭ سوماسىن تولەۋى كەرەك. سونداي-اق بۇل سوماعا 123 182 تەڭگە مەملەكەتتىك باج سالىعى قوسىلدى.
“ادىرنا” ۇلتتىق پورتالى
