22 اقپاندا نۇر-سۇلتاندا 50-60 شاقتى ايەل باسپانا ماسەلەسىن كوتەرىپ، "نۇر وتان" پارتياسىنىڭ باس كەڭسەسىنە جينالدى. نارازى ايەلدەر باسپانادان بولەك، ءاربىر بالاعا 42 500 تەڭگەدەن جاردەماقى تولەۋدى جانە وتكىر ماسەلە كوتەرگەن ايەلدەردى قۋدالاماۋدى تالاپ ەتتى دەپ حابارلايدى «ادىرنا» ۇلتتىق پورتالى ازاتتىققا سىلتەمە جاساپ.
– كەشە عانا قايعىلى وقيعا قايتالاندى. ءبىز جامبىل جاقتا بيلىكتىڭ بالالارىن ۇيدە قالدىرىپ كەتكەن ايەلدى كىنالاپ جاتقانىن ەستىدىك. بۇل دۇرىس ەمەس. بالا ءولىمى كوبەيىپ جاتىر. بۇل ۇكىمەتكە بەرىلگەن ەسكەرتۋ. بيلىك تۇسىنەر ەمەس. ءاربىر بالاعا 10 مىڭ تەڭگەدەن بەرەدى. ول ەشنارسەگە جەتپەيدى... ءار بالاعا 42 500 تەڭگەدەن بەرسىن. سوندا انا كوشەگە شىقپايدى. مەن دە بالالارىمدى سىرتىنان جاۋىپ، تاستاپ كەتتىم. مىنە، تابانىمىزدى توزدىرىپ ءجۇرىپ، بالالارىمىزدان ايىرىلىپ قالىپ جاتىرمىز، – دەيدى 8 بالانىڭ اناسى جۇماعىز كوكەشوۆا.
"نۇر وتانعا" كەلگەندەر جاردەماقىنىڭ ماردىمسىزدىعىن، الەۋمەتتىك كومەكتىڭ ازدىعىن ايتتى. قىمباتشىلىققا شاعىمداندى.
– وسى "نۇر وتان" سايلانار الدىندا حالىقتىڭ جاعدايىن جاسايمىز دەپ ۋادە بەردى. جاڭا جىلدان كەيىن "جاردەماقىنى كوتەردىك" دەيدى. سونداعى قوسقانى – 1,5-2 مىڭ تەڭگە عانا. سول اقشاعا 1,5-2 ليتر سۋ ماي الامىز. ول بىرنەشە كۇنگە عانا جەتەدى. قانت، ۇن، ماكارون قىمباتتاپ كەتتى. ۇننىڭ 25 كيلوسى – 7 مىڭ تەڭگە. 23 تەڭگە "ارتىق العانى" ءۇشىن اتاۋلى الەۋمەتتىك كومەكتەن قاعىلىپ جۇرگەندەر بار. ءبىزدىڭ تالابىمىز – بىزگە اتاۋلى الەۋمەتتىك كومەك تە كەرەك جوق، بىزگە ءبىرىنشى كەزەكتە باسپانا جاعدايىن جاساسىن. ەكىنشىدەن، بالا سانىنا قاراماي ءاربىر بالاعا 42 500 تەڭگەدەن بەرسىن. وسىدان ەكى جىل بۇرىن ءبىر ءۇيدىڭ بەس ءسابيى قازا بولدى. ءدال سونداي وقيعا كەشە جاڭاتاس قالاسىندا بولدى. ەرتەڭگى كۇنى ءبىزدىڭ بالالارىمىزدىڭ باسىنان وسىنداي جاعداي وتپەسىنە كىم كەپىل بولا الادى؟ – دەدى نارازىلاردىڭ ءبىرى اسىل وشاقباەۆا.
ايەلدەر "نۇر وتان" عيماراتىنىڭ ىشىندە "دەپۋتاتتار شىقسىن!", "باسپانا!" دەپ ايقايلادى. "نۇر وتان" وكىلدەرى باستاپقىدا ولاردى زالعا كىرۋگە شاقىردى. بىراق ول جاققا اقپارات قۇرالدارى كىرگىزىلمەگەندىكتەن ايەلدەر زالعا كىرۋدەن باس تارتتى.
نارازىلىق كەزىندە ەكى بالانىڭ اناسى اينۇر ومىرزاقوۆا استانالىق بەلسەندىلەردىڭ ءبىرى فەرۋزا ساپارمەن بىرگە قايعىلى وقيعا بولعان جامبىل وبلىسىنا بارماق بولعان كەزدە پوليتسيانىڭ ولاردى جولدان توقتاتىپ، فەرۋزا ساپاردى ۇستاپ الىپ كەتكەنىن، ءالى كۇنگە دەيىن ونىمەن حابارلاسا الماي وتىرعانىن ايتتى. ول ايەلدەردىڭ فەرۋزا ساپاردى بوساتىپ، وتكىر ماسەلە كوتەرگەن نارازىلاردى قۋدالاماۋدى دا تالاپ ەتىپ وتىرعانىن جەتكىزدى.
– مەنىڭ پىكىرىمشە، ولارعا شىندىق ايتىپ جاتقانىمىز ۇنامايدى. ءبىز قانداي ساتىعا ءتۇسىپ كەتكەنىمىزدى، بالالاردىڭ جايدان جاي ءولىپ جاتپاعانىن، ەكونوميكانىڭ قۇلدىراپ كەتكەنىن ايتىپ وتىرمىز. سونى بيلىك مويىنداماي وتىر. وسىعان دەيىن قانشاما ادام قامالدى، – دەدى اينۇر ومىرزاقوۆا.
ازاتتىق ءتىلشىسى بۇعان بايلانىستى پوليتسيادان جاۋاپ الۋعا تىرىسىپ جاتىر.
ءتۇس كەزىندە نارازى ايەلدەردىڭ الدىنا پارتيانىڭ قالالىق بولىمشەسى توراعاسىنىڭ ءبىرىنشى ورىنباسارى داۋلەت كارىبەك شىقتى.
–كەنەسارى كوشەسىندە قوعامدىق قابىلداۋ بار. سول جاققا بارىپ، وسى سۇراقتاردىڭ بارلىعىن ايعاي–شۋسىز جازىپ قالدىرىڭىزدار. ءبىزدىڭ قۇزىرەتىمىز جەتەتىن ماسەلەنى سول جەردە شەشەمىز، – دەدى پارتيا وكىلى.
بىراق ايەلدەر "جازباشا جاۋاپتان پايدا جوعىن", بۇعان دەيىن "جازعان شاعىمدارىنا جاۋاپ كەلمەگەنىن" ايتىپ، اشۋلاندى.
