الماتى تۇرعىندارى اكىمنىڭ وتستاۆكاعا كەتۋىن تالاپ ەتتى. ويتكەنى بەلۋاردان بالشىق كەشىپ جۇرگەن جۇرتتىڭ باسقا امالى جوق. العاباس اۋىلى قالا اۋماعىنا كىرگەن كەزدە سۋ قۇبىرىن جۇرگىزۋ جۇمىسى باستالعان. سودان بەرى ءۇش جىل وتسە دە قۇرىلىسى اياقتالماعان كوشەدەگى باتپاقتان قازىر اياق الىپ ءجۇرۋ مۇمكىن ەمەس، دەپ حابارلايدى كتك ارناسى.
تۇرعىندار اۋدان اكىمىن لايدىڭ ورتاسىنا شاقىرىپ ەدى، ورىنباسارى عانا كەلدى. اشۋعا بۋلىققان العاباستىقتار سول شەنەۋنىكتى مەردىگەر كومپانيانىڭ باسشىسىمەن بىرگە باتپاقتىڭ ۇستىمەن جۇرگىزدى.
بالتىرىنا دەيىن باتپاق جابىسقان قالاعا قارايتىن ىقشاماۋدان تۇرعىندارى وزدەرىن قالا تۇرعىنىمىز دەپ ايتۋعا ۇيالادى. ءۇش جىل قاتارىنان اياعىنان رەزەڭكە ەتىك شەشپەگەن العاباستىقتاردىڭ شىدامى شەگىنە جەتتى.
ء"جۇرۋ مۇمكىن ەمەس! مىنە، اياعىمىز، ءتۇرىمىز! كۇندە جۇمىسقا بارىپ قايتۋدىڭ ءوزى قيىن بوپ كەتتى! نە سۇمدىق! شىدامنىڭ دا شەگى بار! ءبىز نە ىستەۋىمىز كەرەك", – دەيدى سەرىكقازى راحماتۋللا.
تۇرعىنداردىڭ ايتۋىنشا، بىلىق شەنەۋنىكتەر قۇبىر سالعاننان باستالعان. قارمەن بىرگە قازىلعان جەر دە ەرىپ، اينالا ادام جۇرگىسىز مي باتپاققا اينالادى. حالىق تالاي مارتە اكىمدىككە شاعىمدانىپ بارعان. الايدا ۋادە بەرگەن اكىمدى سول كۇيى تاپپاي قالادى.
"قۇداي ءۇشىن، اكىمدى ەمەس، جولدى اۋىستىرسىنشى! اكىمدى اۋىستىرىپ جىبەرەدى، بولدى سونىمەن قالادى. جىلدا ايتادى، "وي، جاسايمىز، ناتيجە شىعارامىز" دەپ. بىراق جاسالعان جول جوق", – دەيدى تۇرعىنداردىڭ ءبىرى باقىتبەك اسەمجانوۆ.
اكىم ءوزى كەلمەي، ورىنباسارىن جىبەرگەن
باتپاققا باتقان اۋىلدىڭ جايىن ءوز كوزىمەن كورسىن دەپ، العاباستىقتار اۋدان باسشىلىعىن ارنايى كەزدەسۋگە شاقىرعان. الايدا اكىم ءوزى كەلمەي، ورنىنا ورىنباسارىن جىبەرىپتى. ال ول ءوز كەزەگىندە حالىقپەن سويلەسسىن دەپ، ورنىنا باسقا ادامدى الىپ كەلگەن.
"تاپسىرىس بەرۋشى وسى ەنەرگوتيىمدىلىك باسقارماسى. قاراجاتتى بولەتىن الاتاۋ اۋدانى اكىمدىگى ەمەس، وسى باسقارما. مەن سوندىقتان وسى قۇزىرلى مەكەمە جاۋاپ بەرسىن دەپ شاقىردىم", – دەدى الاتاۋ اۋدانى اكىمىنىڭ ورىنباسارى بەكتاس ءسابيتوۆ.
جاۋاپكەرشىلىكتى ءبىر-بىرىنە ىسىرعان باسشىلىق، اقىرى باتپاققا قاتىستى پىكىر ءبىلدىردى. ايتۋلارىنشا، قۇبىردى سالعان بويدا جولدى تەگىستەتىپتى. بىراق سولاي دەپ ايتۋى مۇڭ ەدى، جۇرت شۋلاپ قويا بەردى.
وسىلاي دەپ جۇرتشىلىقتى سەندىرمەك بولعان اكىم ورىنباسارى ءبار پالەنى ءوز اۋزىنان تاپتى. شەنەۋنىكتەردىڭ جالعان سوزىنە شىداماعان حالىق تۋفلي مەن يتاليالىق قىمبات برەندتى كۇرتە كيىپ كەلگەن شەنەۋنىكتى باتپاقتىڭ ۇستىمەن سۇيرەي جونەلدى.
ءۇستى-باسى بىلعانعان اكىم ورىنباسارى اقىرى تۇرعىنداردان قاشىپ تىندى. ال قۇبىر سالۋعا تاپسىرىس بەرگەن باسقارما وكىلدەرى ناۋرىز ايىنىڭ سوڭىنا دەيىن اسفالت سالۋدى باستاۋعا ۋادە بەردى. ال وعان دەيىن العاباس تۇرعىندارىنا باتپاق كەشىپ جۇرە تۇرۋىنا تۋرا كەلەدى.
