Almaty turǵyndary sheneýnikti batpaqqa batyrdy

970

Almaty turǵyndary ákimniń otstavkaǵa ketýin talap etti. Óıtkeni belýardan balshyq keship júrgen jurttyń basqa amaly joq. Alǵabas aýyly qala aýmaǵyna kirgen kezde sý qubyryn júrgizý jumysy bastalǵan. Sodan beri úsh jyl ótse de qurylysy aıaqtalmaǵan kóshedegi batpaqtan qazir aıaq alyp júrý múmkin emes, dep habarlaıdy KTK arnasy.

Turǵyndar aýdan ákimin laıdyń ortasyna shaqyryp edi, orynbasary ǵana keldi. Ashýǵa býlyqqan alǵabastyqtar sol sheneýnikti merdiger kompanııanyń basshysymen birge batpaqtyń ústimen júrgizdi.

Baltyryna deıin batpaq jabysqan qalaǵa qaraıtyn yqshamaýdan turǵyndary  ózderin qala turǵynymyz dep aıtýǵa uıalady. Úsh jyl qatarynan aıaǵynan rezeńke etik sheshpegen alǵabastyqtardyń shydamy shegine jetti.

"Júrý múmkin emes! Mine, aıaǵymyz, túrimiz! Kúnde jumysqa baryp  qaıtýdyń ózi qıyn bop ketti! Ne sumdyq! Shydamnyń da shegi bar! Biz ne isteýimiz kerek", – deıdi Serikqazy Rahmatýlla.

Turǵyndardyń aıtýynsha, bylyq sheneýnikter qubyr salǵannan bastalǵan. Qarmen birge qazylǵan jer de erip, aınala adam júrgisiz mı batpaqqa aınalady. Halyq talaı márte ákimdikke shaǵymdanyp barǵan. Alaıda ýáde bergen ákimdi sol kúıi tappaı qalady.

"Qudaı úshin, ákimdi emes, joldy aýystyrsynshy! Ákimdi aýystyryp jiberedi, boldy sonymen qalady. Jylda aıtady, "oı, jasaımyz, nátıje shyǵaramyz" dep. Biraq jasalǵan jol joq", – deıdi turǵyndardyń biri Baqytbek Ásemjanov.

Ákim ózi kelmeı, orynbasaryn jibergen

Batpaqqa batqan aýyldyń jaıyn óz kózimen kórsin dep, alǵabastyqtar aýdan basshylyǵyn arnaıy kezdesýge shaqyrǵan. Alaıda ákim ózi kelmeı, ornyna orynbasaryn jiberipti. Al ol óz kezeginde halyqpen sóılessin dep, ornyna basqa adamdy alyp kelgen.

"Tapsyrys berýshi osy energotıimdilik basqarmasy. Qarajatty bóletin Alataý aýdany ákimdigi emes, osy basqarma. Men sondyqtan osy quzyrly mekeme jaýap bersin dep shaqyrdym", – dedi Alataý aýdany ákiminiń orynbasary Bektas Sábıtov.

Jaýapkershilikti bir-birine ysyrǵan basshylyq, aqyry batpaqqa qatysty pikir bildirdi. Aıtýlarynsha, qubyrdy salǵan boıda joldy tegistetipti. Biraq solaı dep aıtýy muń edi, jurt shýlap qoıa berdi.

Osylaı dep jurtshylyqty sendirmek bolǵan ákim orynbasary bár páleni óz aýzynan tapty. Sheneýnikterdiń jalǵan sózine shydamaǵan halyq týflı men ıtalııalyq qymbat brendti kúrte kıip kelgen sheneýnikti batpaqtyń ústimen súıreı jóneldi.

Ústi-basy bylǵanǵan ákim orynbasary aqyry turǵyndardan qashyp tyndy. Al qubyr salýǵa tapsyrys bergen basqarma ókilderi naýryz aıynyń sońyna deıin asfalt salýdy bastaýǵa ýáde berdi. Al oǵan deıin Alǵabas turǵyndaryna batpaq keship júre turýyna týra keledi.

Pikirler
Redakııa tańdaýy