بوكستان وليمپيادا چەمپيونى، الماتى ءماسليحاتىنىڭ دەپۋتاتى ەرماحان يبرايموۆ جۋرناليست نارتاي ارالبايۇلىنا بەرگەن سۇحباتىندا ەلدەگى جاردەماقىلار مەن كوپ بالالى وتباسىلاردىڭ جاعدايى تۋرالى پىكىر ءبىلدىردى، دەپ حابارلايدى «ادىرنا» ءتىلشىسى.
«Nur Otan پارتياسىنىڭ ءوز باعدارلاماسى بار، ءبىز دە وسى باعدارلاما بويىنشا ارەكەت ەتەمىز. تاۋەلسىزدىككە قول جەتكىزگەنىمىزگە 30 جىل بولدى. قازىر جاعدايىمىز جاقسى، جۇمىسىمىز بار»، — دەيدى ىبىرايىموۆ.
ينتەرۆيۋەر سۇحبات بارىسىندا قازاقستانداعى ەڭ تومەنگى جالاقى –42 500 تەڭگە، ەڭ تومەنگى كۇنكورىس —دەڭگەيى 34 302 تەڭگە، كەدەيلىك شەگى — 24 011 تەڭگە ەكەنىن اتاپ ءوتتى.
«42 مىڭ تەڭگەگە ەشكىمنىڭ كۇنى قاراپ تۇرعان جوق دەپ ويلايمىن. جۇمىس ىستەگىسى كەلەتىندەر ارقاشان جول تابادى. مەنىڭ ويىمشا، كەيبىر قازاقستاندىقتار وزدەرىنىڭ كەدەيلىگىنە كىنالى»، - دەپ تولىقتىردى ءماسليحات دەپۋتاتى.
سپورتشى جامبىل وبلىسىندا بولعان قايعىلى وقيعا تۋرالى دا ءسوز قوزعادى.
«شىنىنا كەلگەندە، بۇل – وتە وكىنىشتى. بۇكىل قازاقستان ءدۇر سىلكىندى. ەڭ بولماسا، كورشىگە تاپسىرىپ كەت، بىراق 5 بالانى تۇندە قالدىرىپ كەتۋ دەگەن دۇرىس ەمەس. بەس بالانى سىرتىنان جاۋىپ، كەتىپ قالۋ – ناعىز تۇك كورمەگەندىك»،-دەدى ول.
«ادىرنا» ۇلتتىق پورتالى
