تۇرىكتىڭ قارۋ-جاراق، مەديتسينا سالاسىندا تەحنولوگيا وندىرەتىن "Aselsan" كومپانياسى 2020 جىلى 400 ميلليون دوللاردىڭ ءونىمىن 20-دان استام مەملەكەتكە ەكسپورتتاعان. بۇل كومپانيا تاريحىنداعى رەكوردتىق كورسەتكىش. 2020 جىلدىڭ سوڭىندا تاعى ءبىر مەملەكەتپەن 38 ميلليون دوللارعا كەلىسىمگە وتىرعان.
"Aselsan" ونىمدەرىن تۇتىنۋشىلار اراسىندا ناتو ەلدەرى دە بار. بۇل ارينە، كومپانيا ءۇشىن الەمدىك ماسشتابپەن العاندا ءىرى جەتىستىك ەمەس. بىراق 20 جىل بۇرىن "Aselsan", "بايراكتار", "روكەتسان" اتتى تۇركيا كومپانيالارى مۇنداي جەتىستىكتەرگە جەتەدى دەگەنگە سەنۋ قيالمەن بىردەي ەدى. ول كەزدە تۇكەڭدەر 1 ميلليون ليراعا قوعامدىق اجەتحاناعا كىرىپ، ستامبۋلدا كوپقاباتتى ۇيلەرگە سۋ جەتپەي، حالىق سۋدى كانيسترمەن تاسىپ جۇرگەن زامان بولاتىن. بىراق اقىرىنداپ كۇشەيىپ كەلەدى. ەڭ باستىسى قولدارىنان كەلۋدە.
نەگىزى قازاقستاننىڭ پوتەنتسيالى، وركەنيەتتى ەلدەردە وقىپ كەلگەن جاستاردىڭ مۇمكىندىگى اقش پەن ەۆروپاعا جەتپەسە دە تۇكەڭدەردى قۋىپ جەتىپ، ءتىپتى باسىپ وزۋعا جەتكىلىكتى. ءبىزدىڭ جاستار وpen mind, جاڭالىققا اشىق، ەركىن ويلى، بىرنەشە تىلدە ەركىن سايرايتىن بۋىن. مەملەكەتتىك قولداۋ، دۇرىس ستراتەگيا، الەۋمەتتىك جاعداي مەن تەحنوكراتتىق ساناعا قاراي ساياساتتىڭ بەتى بۇرىلسا، قازاق جاستارىنىڭ قولىنان دا كەلەدى. ءبىر تەحنوكراتتىق كومپانيا ناقتى رەزۋلتاتپەن جارق ەتىپ شىقسا، تەحنوكراتتىق بۋممەن كەلەسى باستامالارعا جول اشادى. جاستاردىڭ بۇل پاسسيونارلىق كۇشىن نەگە پايدالانبايمىز، وسى ماعان دا جۇمباق.
ال، جەر كەڭ. حالىق از. تابيعي بايلىق كوپ. ەكى جاعىمىزدا ەكى ءىرى كورشى. الماعايىپ وزگەرىپ جاتقان حالىقارالىق ساياسات. گەوساياسي وزگەرىستەر شاپشاڭ ورىن الىپ جاتقان زاماندامىز. قاشانعى كوپۆەكتورلى ساياسات كومەكتەسەدى؟ مەملەكەتتىك مۇددە ماسشتابىمەن العاندا ۋاقىتتان ۇتىلىپ جاتىرمىز.
500 جىلدىق تاريحىمىزدا تەحنوكراتتىق سالادا جارق ەتكەن كەزىمىز جوق. ادامزاتتىڭ دامۋىنا قوسقان ۇلەسىمىز از. تەحنولوگيانىڭ جوقتىعىنان، قولىمىزعا ساداق الىپ، زەڭبىرەككە قارسى شىعامىز دەپ وزگەگە بوداندىققا ءتۇسىپ، ۇنەمى توقپاقتىڭ استىندا باسىلىپ قالعان ەلمىز. بۇل ولقىلىقتى تولتىرۋ كەرەك. تاريحي قاتەلىكتەن ساباق الۋ پارىز. ءتۇبى ءبىز بۇعان كەلەمىز. نە قازىر، نە كەيىن. بىراق كەلەمىز. قازاقستاننىڭ قاي پرەزيدەنتى مۇنى ىسكە اسىرادى، بۇل ۇلكەن سۇراق. ساياسي ەرىك-جىگەر جەتكىلىكتى بولعان ءبىر زاماندا ءتۇبى شىعۋى ءتيىس. ماسەلە قاي پرەزيدەنت تۇسىندا شىعادى. سول پرەزيدەنت ەلدىڭ تاريحىندا ەرەكشە اتپەن قالادى. ال بۇعان ۇمتىلۋ، ۇمتىلماۋ ساياساتكەردىڭ تۇلعالىق بولمىسى مەن پوتەنتسيالىنا بايلانىستى دۇنيە.
مۇنى ىسكە اسىرماي، دومبىرا تارتىپ، ولەڭ ايتىپ جۇرە بەرۋگە دە بولادى. ونى اقتاپ الۋعا دا مىڭ سان سىلتاۋ تابۋ قيىن ەمەس نەگىزى. ءسوز ارتىلمايدى عوي بىزدەن. بىراق مەملەكەتتىك مۇددە تۇرعىسىنان بۇل بىزگە ءتيىمدى جول بولمايدى. تەحنولوگيادا ۋاقىتتان ۇتىلۋ ەڭ باستى قاتەلىك. وزگەلەر قازىردىڭ وزىندە كوش ىلگەرى كەتتى.
باۋىرجان سەرىكباەۆ،
"ادىرنا" ۇلتتىق پورتالى
