اقش پەن ءيزرايلدىڭ يرانعا قارسى جۇرگىزگەن وپەراتسياسى كەزىندە شامامەن 150 امەريكالىق اسكەري قىزمەتكەر جارالانعان. بۇل تۋرالى Reuters اگەنتتىگى جازدى، دەپ حابارلايدى «ادىرنا» ءتىلشىسى.
بۇعان دەيىن اقش قورعانىس مينيسترلىگى 140 قىزمەتكەردىڭ جاراقات العانىن جەتكىزگەن.
«ەپيكالىق قاھار» وپەراتسياسى باستالعالى بەرى 10 كۇن بويى ۇزدىكسىز جاسالعان شابۋىلداردىڭ ناتيجەسىندە شامامەن 140 امەريكالىق اسكەري قىزمەتكەر جارالاندى»،- دەلىنگەن حابارلامادا.
كەيىننەن بۇل كورسەتكىشتىڭ وسكەنى ايتىلدى. مالىمەتكە سايكەس، جارالانعانداردىڭ 108-ءى قايتادان قىزمەتىنە ورالعان, ال سەگىز ادام اۋىر جاعدايدا جاتىر.
ايتا كەتەيىك، CENTCOM وپەراتسيا كەزىندە جەتىنشى امەريكالىق اسكەري قىزمەتكەردىڭ قازا تاپقانىن حابارلاعان ەدى.
اقش پەن يزرايل 28 اقپاندا يرانعا قارسى اسكەري وپەراتسيا باستاعان ەدى. شابۋىلدار يراننىڭ ەڭ ءىرى قالالارىنا، سونىڭ ىشىندە تەگەرانعا جاسالدى. اق ءۇي بۇل شابۋىلدى تەگەراننان كەلۋى مۇمكىن زىمىراندىق جانە يادرولىق قاۋىپپەن ءتۇسىندىردى.
ال يسلام رەۆوليۋتسياسى ساقشىلارى كورپۋسى جاۋاپ رەتىندە اۋقىمدى وپەراتسيا باستالعانىن مالىمدەپ، يزرايلدەگى نىساندارعا سوققى جاساعان. سونداي-اق سوققىلار باحرەين، يوردانيا، كاتار، كۋۆەيت، ءباا جانە ساۋد ارابياسىنداعى اقش نىساندارىنا دا تيگەن.
