شىمكەنتتە مەكتەپ وقۋشىسى سىنىپتاسىنىڭ اكەسىن ۇرىپ ءولتىردى. 15 جاستاعى بالاعا مارقۇمنىڭ «قىزىما تيىسپە» دەپ ەسكەرتكەنى ۇناماعان كورىنەدى.
ەرەسەك ادامنىڭ سوزىنە كەك ساقتاپ قالعان 9-سىنىپ وقۋشىسى 42 جاستاعى ازاماتتى كوشەدە كۇتىپ تۇرىپ، تاسپەن ۇرىپ قۇلاتقان. سوسىن ابدەن تەپكىلەگەن، دەپ حابارلايدى “ادىرنا” ۇلتتىق پورتالى كتك تەلەارناسىنا سىلتەمە جاساپ.
ال ونىڭ جاقىندارى كۇدىكتىنىڭ جانىندا سىبايلاستارى بولعان دەپ وتىر.
زيافات ىدىرىسوۆتىڭ قايتىس بولعانىنا جاقىندارى سەنە الماي جىلايدى. جەكە شارۋاسىمەن كوشەگە كەتكەن 42 جاستاعى ازاماتتىڭ دەنەسى تۇندە ءۇيىنىڭ ماڭىنان تابىلدى. «باس سۇيەگىنىڭ مىلجا-مىلجاسى شىعىپ، سوڭعى دەمىن الىپ جاتقاندا عانا كورىپ ۇلگەردىك»، – دەيدى تۋىستارى. ال ونىڭ الدىندا سول ماڭدا ءۇش-ءتورت جەتكىنشەكتىڭ توپتاسىپ تۇرعانىن كورگەندەر بار. ولاردىڭ تاياق ۇستاپ تۇرعانىن دا بايقاعان.
«بەت-اۋزىنىڭ ءبارى قان. ساۋ-تامتىعىن قالدىرماي ۇرىپ، ءتىپتى قابىرعالارىن سىندىرىپ تاستاعان. تاسپەن دە، تاياقپەن دە، ءتىپتى كەتپەنمەن دە ۇرعان. ەندى ارتىندا قالعان ۇل-قىزىن كىم اسىراپ، كىم جەتكىزەدى؟»، – دەيدى مارقۇمنىڭ قارىنداسى سەۆدا ىدىرىسوۆا.
زيافاتتى ولتىرگەن 9-سىنىپتىڭ وقۋشىسى بولىپ شىقتى. ول مارقۇمنىڭ قىزىمەن ءبىر سىنىپتا وقيدى ەكەن. 15 جاستاعى پاردامبەك سايىپوۆ قىزدارعا قىرعيداي تيەتىن بۇزىقتاۋ بالا بولعان. ودان ءجابىر كورگەنىن قىزى بىرنەشە مارتە اكەسىنە ايتىپ بارىپتى. سوندىقتان زيافات «قىزىمنان اۋلاق ءجۇر» دەپ جاسوسپىرىمگە ەسكەرتۋ جاساعان. 9-سىنىپ وقۋشىسى وسىعان كەكتەنگەن بولۋى مۇمكىن.
«ول بالامەن 4-سىنىپقا دەيىن ءبىر پارتادا وتىردىم. ءبىرىنشى سىنىپتان بەرى ماعان دا، باسقا قۇربىلارىما دا تىنىشتىق بەرمەيتىن. بىزگە بوقاۋىز ءسوز ايتىپ، اياقتان شالىپ قۇلاتۋ وعان كۇندەلىكتى نارسە. مەن تۇگىلى، وزگە قىزدار دا ول تۋرالى اتا-اناسىنا تالاي مارتە شاعىمدانعان. بىراق وعان ءبارىبىر»، – دەيدى مارقۇمنىڭ قىزى حايالا ناريمانوۆا.
№55 مەكتەپ باسشىلىعى پاردامبەك سايىپوۆقا شاڭ جۋىتپادى. وسىعان دەيىن بۇزىقتىعىن نە مۇعالىمدەر، نە مەكتەپ پسيحولوگى بايقاماپتى. «وسى جاعدايدان كەيىن جوعارى سىنىپ وقۋشىلارىنا بەيمەزگىل ۋاقىتتا كوشە كەزۋگە تىيىم سالامىز»، – دەيدى مەكتەپ ديرەكتورى.
«اتا-انا، وقۋشى تاراپىنان ونداي شاعىم تۇسكەن ەمەس. ايتىپ تۇرمىن عوي، ورتا ءبىلىمدى قاراپايىم بالا».
كىسى قانىن جۇكتەگەن ءجاسوسپىرىم قازىر قاماۋعا الىندى. وقيعا ورنىنا جەتكىزىلىپ، اكەسىندەي ادامدى قالاي ۇرىپ ولتىرگەنىن دە كورسەتىپ بەردى. ونى مارقۇمنىڭ تۋىستارى تاسپاعا ءتۇسىرىپ العان. بىراق پوليتسەيلەر بۇل تۋرالى ماردىمدى ەشتەڭە ايتا الماي وتىر.
سىنىپتاسىنىڭ اكەسىن ۇرىپ ولتىرگەن وقۋشىعا قانداي باپپەن ءىس قوزعالعانى بەلگىسىز. سونداي-اق مارقۇمنىڭ تۋىستارى ايتقانداي، قىلمىسقا وزگە سىبايلاستارى قاتىسقان با، جوق پا، ونى پوليتسەيلەر ايتا المايدى. قازىر جالعىز كۇدىكتى قاماۋدا، ال مارقۇمنىڭ دەنەسى جەر قوينىنا تاپسىرىلدى.
