Shymkentte mektep oqýshysy synyptasynyń ákesin uryp óltirdi. 15 jastaǵy balaǵa marqumnyń «qyzyma tıispe» dep eskertkeni unamaǵan kórinedi.
Eresek adamnyń sózine kek saqtap qalǵan 9-synyp oqýshysy 42 jastaǵy azamatty kóshede kútip turyp, taspen uryp qulatqan. Sosyn ábden tepkilegen, dep habarlaıdy “Adyrna” ulttyq portaly KTK telearnasyna silteme jasap.
Al onyń jaqyndary kúdiktiniń janynda sybaılastary bolǵan dep otyr.
Zııafat Ydyrysovtyń qaıtys bolǵanyna jaqyndary sene almaı jylaıdy. Jeke sharýasymen kóshege ketken 42 jastaǵy azamattyń denesi túnde úıiniń mańynan tabyldy. «Bas súıeginiń mylja-myljasy shyǵyp, sońǵy demin alyp jatqanda ǵana kórip úlgerdik», – deıdi týystary. Al onyń aldynda sol mańda úsh-tórt jetkinshektiń toptasyp turǵanyn kórgender bar. Olardyń taıaq ustap turǵanyn da baıqaǵan.
«Bet-aýzynyń bári qan. Saý-tamtyǵyn qaldyrmaı uryp, tipti qabyrǵalaryn syndyryp tastaǵan. Taspen de, taıaqpen de, tipti ketpenmen de urǵan. Endi artynda qalǵan ul-qyzyn kim asyrap, kim jetkizedi?», – deıdi marqumnyń qaryndasy Sevda Ydyrysova.
Zııafatty óltirgen 9-synyptyń oqýshysy bolyp shyqty. Ol marqumnyń qyzymen bir synypta oqıdy eken. 15 jastaǵy Pardambek Saıypov qyzdarǵa qyrǵıdaı tıetin buzyqtaý bala bolǵan. Odan jábir kórgenin qyzy birneshe márte ákesine aıtyp barypty. Sondyqtan Zııafat «qyzymnan aýlaq júr» dep jasóspirimge eskertý jasaǵan. 9-synyp oqýshysy osyǵan kektengen bolýy múmkin.
«Ol balamen 4-synypqa deıin bir partada otyrdym. Birinshi synyptan beri maǵan da, basqa qurbylaryma da tynyshtyq bermeıtin. Bizge boqaýyz sóz aıtyp, aıaqtan shalyp qulatý oǵan kúndelikti nárse. Men túgili, ózge qyzdar da ol týraly ata-anasyna talaı márte shaǵymdanǵan. Biraq oǵan báribir», – deıdi marqumnyń qyzy Haıala Narımanova.
№55 mektep basshylyǵy Pardambek Saıypovqa shań jýytpady. Osyǵan deıin buzyqtyǵyn ne muǵalimder, ne mektep psıhology baıqamapty. «Osy jaǵdaıdan keıin joǵary synyp oqýshylaryna beımezgil ýaqytta kóshe kezýge tyıym salamyz», – deıdi mektep dırektory.
«Ata-ana, oqýshy tarapynan ondaı shaǵym túsken emes. Aıtyp turmyn ǵoı, orta bilimdi qarapaıym bala».
Kisi qanyn júktegen jasóspirim qazir qamaýǵa alyndy. Oqıǵa ornyna jetkizilip, ákesindeı adamdy qalaı uryp óltirgenin de kórsetip berdi. Ony marqumnyń týystary taspaǵa túsirip alǵan. Biraq polıeıler bul týraly mardymdy eshteńe aıta almaı otyr.
Synyptasynyń ákesin uryp óltirgen oqýshyǵa qandaı bappen is qozǵalǵany belgisiz. Sondaı-aq marqumnyń týystary aıtqandaı, qylmysqa ózge sybaılastary qatysqan ba, joq pa, ony polıeıler aıta almaıdy. Qazir jalǵyz kúdikti qamaýda, al marqumnyń denesi jer qoınyna tapsyryldy.
