اتىراۋدا تۇزەۋ مەكەمەسىنە جەتكىزىلگەن سالەمدەمەنىڭ ىشىنەن ەسىرتكى تابىلدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
16 اقپان كۇنى ۋگ-157/9 مەكەمەسىنە كەلگەن سالەمدەمەلەردى تەكسەرۋ كەزىندە اقتاۋ قالاسىنان كەلگەن باندەرولدان اق ءتۇستى ۇنتاق تابىلدى. سونداي-اق تەمەكىنىڭ ىشىنە تىعىلعان جاسىل ءتۇستى ءشوپ انىقتالدى.
اتالعان زاتتار تابىلعان بويدا مەكەمەگە اتىراۋ قالالىق پوليتسيا باسقارماسىنىڭ جەدەل-تەرگەۋ توبى شاقىرىلدى. قازىرگى تاڭدا ءتيىستى ساراپتامالار تاعايىندالدى.
«قر قك-ءنىڭ 297-بابىمەن (ەسىرتكى، پسيحوتروپتىق زاتتاردى، سول تەكتەستەردى وتكىزۋ ماقساتىندا زاڭسىز دايىنداۋ، قايتا وڭدەۋ، يەمدەنۋ، ساقتاۋ، تاسىمالداۋ، جونەلتۋ نە وتكىزۋ) قىلمىستىق ءىس قوزعالدى»،– دەدى مەكەمە باستىعى دۋمان تاجەنوۆ.
«ادىرنا» ۇلتتىق پورتالى