ناۋرىز مەيرامىن 10 كۇن تويلاۋ تۋرالى ۇسىنىس قارالدى، دەپ حابارلايدى “ادىرنا” ۇلتتىق پورتالى.
قۇجاتقا سايكەس، ناۋرىز مەيرامى 14-23 ناۋرىز ارالىعىندا اتاپ وتىلەدى:
14 ناۋرىز – «كورىسۋ كۇنى»
15 ناۋرىز – «جايلاۋ كۇنى»
16 ناۋرىز – «شەجىرە كۇنى»
17 ناۋرىز – «تاريحقا تاعزىم كۇنى»
18 ناۋرىز – «يگى ىستەر كۇنى»
19 ناۋرىز – «شىمىرلىق پەن شەبەرلىك كۇنى»
20 ناۋرىز – «زياتكەرلىك كۇنى»
21 ناۋرىز – «ۇلتتىق تاعامدار كۇنى»
22 ناۋرىز – «ۇلىستىڭ ۇلى كۇنى»
23 ناۋرىز – «جورالعى كۇنى»
«قازاقستان رەسپۋبليكاسىنىڭ پرەزيدەنتى قاسىم-جومارت توقاەۆ «تاۋەلسىزدىك بارىنەن قىمبات» ماقالاسىندا ناۋرىز مەيرامىن تويلاۋ تۇجىرىمداماسىن ازىرلەپ، كوكتەم مەرەكەسىنىڭ مازمۇنىن بايىتۋدى تاپسىردى. (...) ناۋرىز مەيرامىنىڭ نەگىزگى ماقساتى - قازاقستان جەرىندە بەيبىتشىلىك پەن دوستىقتى نىعايتۋ، ۇلتتىق بىرەگەيلىكتى ساقتاۋ، وتباسىلىق قۇندىلىقتاردى دارىپتەۋ، قورشاعان ورتاعا ۇقىپتى قاراۋدى قالىپتاستىرۋ»، – دەلىنگەن قۇجاتتا.
كونتسەپتسياعا سايكەس مەيرامنىڭ مىندەتتەرى مىناداي:
جالپىقازاقستاندىق رۋحاني قۇندىلىقتاردى نىعايتاتىن قازاق حالقىنىڭ سالت-داستۇرلەرىن جاڭعىرتۋ، ىنتىماق-بىرلىكتى ارتتىرۋ;
مەيرام كەزىندە ءار ادام وتباسىنا، اتا-اناسىنا بارىپ، حال-جاعداي سۇراسۋ ارقىلى وتباسى ينستيتۋتىن كۇشەيتۋ;
ازاماتتىق بەيبىتشىلىكتى ساقتاۋ، الەۋمەتتىك ارىپتەستىكتى جانە قايىرىمدىلىق جاساۋ مادەنيەتىن دامىتۋ;
ەتنوسارالىق قاتىناستار مادەنيەتىن دامىتۋ، قوعامداعى دوستىق پەن سەنىمدى نىعايتۋ;
قازاقستان تابيعاتىنىڭ بىرەگەيلىگىن، تابيعاتقا ۇقىپتى قاراۋدى ۇعىنۋ، ەكولوگيالىق مادەنيەتتى جانە ەلدى مەكەندەردىڭ اۋماقتارىن اباتتاندىرۋ بويىنشا قوعامدىق باستامالاردى دامىتۋ.
«رۋحاني جاڭعىرۋ» باعدارلاماسىنىڭ يدەيالىق قۇندىلىقتارىن ىسكە اسىرۋ ءمان ماتىنىندە ۇلىستىڭ ۇلى كۇنى – ناۋرىز مەيرامىن اتاپ ءوتۋدىڭ ءمانى جوعارى. ناۋرىز – ۇيلەسىمنىڭ، بەرەكە مەن بىرلىكتىڭ مەيرامى. بۇل ۇلتتىق بىرەگەيلىكتى ساقتاۋ، پراگماتيزمدى قالىپتاستىرۋ، سانانىڭ اشىقتىعىن ارتتىرۋ تۇرعىسىنان ماڭىزدى مەيرام» – دەلىنگەن تۇجىرىمدامادا.
ەسكە سالايىق، 2020 جىلدىڭ اقپانىندا «رۋحاني جاڭعىرۋ» قازاقستاندىق قوعامدىق دامۋ ينستيتۋتى جانىنداعى «رۋحاني جاڭعىرۋ» ورتالىعىنىڭ جەتەكشىسى جانار بۇقانوۆا قازاقستاندا ناۋرىز مەيرامىن توعىز كۇن اتاپ ءوتۋ ۇسىنىلعانىن ايتقان بولاتىن.
