پاۆلودارلىق جەدەل ۋاكىلدەر 2018 جىلى كىسى ولتىرگەن كۇدىكتىنى قۇرىقتادى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
–10 اقپاندا “Anti-Fraud” جانە “بارەر” جەدەل-الدىن الۋ ءىس-شارالارىن وتكىزۋ بارىسىندا پاۆلودار قالاسىندا جەدەل ۋاكىلدەر كىسى ولتىرگەنى ءۇشىن ىزدەۋدە جۇرگەن 39 جاستاعى ەر ادامدى ۇستادى. ەر ادام 2018 جىلدىڭ 25 ماۋسىمىندا ساعات 03.25 شاماسىندا اقسۋ قالاسىنىڭ ءدامحانالارىنىڭ بىرىندە ءوزىنىڭ تانىسىمەن بىرگە اقسۋ قالاسىنىڭ تۇرعىنىن ۇرىپ-سوعىپ، سودان كەيىن ونى “لەنينسك-كۋرچاتوۆ” اۆتوجولىنىڭ بويىنداعى ورمان بەلدەۋىنە اپارىپ ولتىرگەن. ونىڭ سىبايلاسى وسى قىلمىسى ءۇشىن 18 جىلعا باس بوستاندىعىنان ايىرىلعان، – دەدى پاۆلودار وبلىسى پوليتسيا دەپارتامەنتىنىڭ باستىعى نۇرلان ءماسىموۆ.
پوليتسيا قىزمەتكەرلەرى كۇدىكتىنىڭ اسا اۋىر قىلمىس جاساعاننان كەيىن جازادان قۇتىلۋ ماقساتىندا تەرگەۋ ورگاندارىنان جاسىرىنعانىن جانە وعان حالىقارالىق ىزدەۋ جاريالانعانىن اتاپ ءوتتى.
قازىرگى تاڭدا قازاقستان رەسپۋبليكاسى قك-ءنىڭ 99-بابىنىڭ 2-بولىگى (ادام ءولتiرۋ) بويىنشا سوتقا دەيىنگى تەرگەۋ جۇرگىزىلۋدە. ۇستالعان ازامات پاۆلودار قالاسىنىڭ ۋاقىتشا ۇستاۋ يزولياتورىنا قامالدى.
«ادىرنا» ۇلتتىق پورتالى
