بويجەتكەندى ۇيىنە شاقىرىپ، زورلاعان ەكس-پروكۋرور مەن بانك مەنەدجەرىنە قاتىستى سوتتىڭ شەشىمى شىقتى.
بۇگىن مەملەكەتتىك ايىپتاۋشى الماتىداعى بوستاندىق اۋداندىق سوتىندا تيمۋر تىلەمباەۆ پەن بانكتىڭ بۇرىنعى توپ-مەنەدجەرى قانات اليقۇلدىڭ قىلمىس جاساعان كەزدە ماس بولعانى ەسكەرىلىپ، جازانىڭ كۇشەيتىلگەنىن جانە ءىستىڭ تولىقتاي دالەلدەنگەنىن جەتكىزدى. ەندى ولاردىڭ ارقايسىسى جابىرلەنۋشى تاراپقا ءبىر جارىم ميلليون تەڭگەدەن بەرۋى ءتيىس. بۇل تۋرالى "ادىرنا" ۇلتتىق پورتالى ەۋرازيا ءبىرىنشى ارناسىنا سىلتەمە جاساپ حابارلايدى.
تەمىرجان قۇداباەۆ، №2 بوستاندىق اۋداندىق سوتىنىڭ سۋدياسى:
«سوت قىلمىستىق-پروتسەسسۋالدىق كودەكس باپتارىنىڭ نەگىزىندە مىناداي شەشىم قابىلدادى. قانات اليقۇل مەن تيمۋر تىلەمباەۆ كىنالى دەپ تانىلىپ، ارقايسىسى 8 جىلعا باس بوستاندىعىنان ايىرىلادى. ەكەۋى دە جازاسىن ورتاشا قاۋىپسىزدىك مەكەمەسىندە وتەيدى».
قىلمىستىق ءىس باستالعالى التى اي بويى ۇيقاماقتا وتىرعان پروكۋرور وتىرىس اياقتالعاننان كەيىن بىردەن قاماۋعا الىنباق. جانە ولاردىڭ 15 كۇن ىشىندە اپپەلياتسيالىق سوتقا شاعىمدانۋىنا بولادى.
ەستەرىڭىزگە سالا كەتەيىك وسىدان التى اي بۇرىن 2019 جىلى بانك قىزمەتكەرىنىڭ ۇيىنە قوناققا بارعان قىزدى بۇرىنعى پروكۋرور ەكەۋى كۇشتەپ زورلاعان. قاشىپ شىققان جابىرلەنۋشى وسىدان كەيىن بىردەن قۇقىق قورعاۋ ورىندارىنا جۇگىنگەن ەدى. الايدا، ادۆوكات ءتارتىپ ساقشىلارى كۇدىكتىلەرگە كومەك كورسەتىپ قورلىق كورگەن قىزدىڭ مەكەن-جايىن بەرگەن.
وسىدان كەيىن ونىڭ ۇيىنە كەلىپ قورقىتقانى تۋرالى حابارلاعان بولاتىن. بۇل فاكت بويىنشا تەرگەۋ جۇرگىزىلىپ، مەرزىمىنىڭ وتكەنىنە بايلانىستى ءىس جابىلىپتى. ال، قورعاۋشى زورلىق ۋاقىتىنىڭ بولعانىنا نەبارى ءبىر جىل عانا وتكەنىن جەتكىزدى.
