الەۋمەتتىك جەلىدە دەكرەتكە شىققان كەلىنشەكتەردىڭ ارىز-شاعىمى تارادى. ولار توتەنشە جاعداي كەزىندە 42 500 تەڭگەنى العان، ەندى ءبىر جاسقا دەيىن بالا كۇتىمىنە بەرىلەتىن جاردەماقى تولەنبەي جاتىر دەپ جازادى Sputnik قازاقستان تىلشىسىنە سىلتەمە جاساپ «ادىرنا» ۇلتتىق پورتالى.
ەسكە سالا كەتسەك، وتكەن جىلى توتەنشە جاعداي كەزىندە تابىسىنان ايىرىلعان ادامدارعا 42 500 تەڭگەدەن كومەك بەرىلگەن بولاتىن. ول اقشا مەملەكەتتىك الەۋمەتتىك ساقتاندىرۋ قورىنىڭ ەسەبىنەن تولەندى. ودان بولەك، زاڭ بويىنشا قوردان ەڭبەككە جارامسىز بولىپ قالۋ، اسىراۋشىسىنان ايىرىلۋ، جۇمىسسىز قالۋ، جۇكتىلىك پەن بوسانۋ، جاڭا تۋعان بالانى اسىراپ الۋ جانە ءبىر جاسقا دەيىن بالا كۇتىمىنە بايلانىستى الەۋمەتتىك تولەمدەر بەرىلەدى. قوردىڭ الەۋمەتپەن بايلانىس دەپارتامەنتىنىڭ ديرەكتورى گۇلباعيلا بولاتبەكوۆانىڭ سوزىنشە، الەۋمەتتىك تولەمدى تاعايىنداۋ كەزىندە مەملەكەتتىك الەۋمەتتىك ساقتاندىرۋ قورى تەكسەرىس جۇرگىزۋگە قۇقىلى. ويتكەنى توتەنشە جاعداي كەزىندە كەيبىر ادامدار جۇمىس ىستەپ، جالاقى السا دا، ءوز بەتىنشە 42 500 تەڭگەگە ءوتىنىش جىبەرگەن.
"ايەلدىڭ جالاقى العانى، سونداي-اق، ءبىر مەزگىلدە توتەنشە جاعداي جانە (نەمەسە) كارانتين كەزەڭىنە تولەم العانى انىقتالعان جاعدايدا الىنعان 42 500 تەڭگە كولەمىندەگى تولەمدى ەرىكتى تۇردە قايتارۋى قاجەت", - دەيدى گۇلباعيلا بولاتبەكوۆا. وسى ورايدا دەپارتامەنت باسشىسى توتەنشە جاعداي مەن كارانتين كەزىندە كىرىسىنەن ايىرىلعانى تۋرالى جالعان مالىمەت بەرگەنى ءۇشىن ءوتىنىش بەرۋشىنىڭ ءوزى جاۋاپتى ەكەنىن ەسكەرتتى. "ال، شىنىمەن دە، ەڭبەك اقىسى ساقتالمايتىن دەمالىستا بولعان جانە كورسەتىلگەن كەزەڭدە مەملەكەتتىك الەۋمەتتىك ساقتاندىرۋ قورىنان تولەم العان ءوتىنىش بەرۋشىلەر باسقا تولەمدەرگە ءوتىنىش جىبەرگەندە 42 500 تەڭگەنى قايتارمايتىنىن اتاپ وتكەن ءجون", - دەيدى گۇلباعيلا بولاتبەكوۆا.
ول ءبىر جاسقا دەيىن بالا كۇتىمىنە تولەنەتىن جاردەماقى قالاي ەسەپتەلەتىنىن دە ءتۇسىندىردى. بولاتبەكوۆانىڭ سوزىنشە، توتەنشە جاعداي بولعان ايلار ەسەپتەن الىنىپ تاستالادى. ويتكەنى ول كەزدە ادامنىڭ كىرىسى بولماعان. سونىڭ ورنىنا الدىنداعى ايلاردىڭ تابىسى ەسەپتەلەدى. وسىلايشا ايەلدىڭ ورتاشا تابىسى انىقتالادى دا، الەۋمەتتىك تولەم تاعايىندالادى. وعان 12 ايدىڭ ىشىندە ءوتىنىش بەرۋگە بولادى.
