Áleýmettik jelide dekretke shyqqan kelinshekterdiń aryz-shaǵymy tarady. Olar tótenshe jaǵdaı kezinde 42 500 teńgeni alǵan, endi bir jasqa deıin bala kútimine beriletin járdemaqy tólenbeı jatyr dep jazady Sputnik Qazaqstan tilshisine silteme jasap «Adyrna» ulttyq portaly.
Eske sala ketsek, ótken jyly tótenshe jaǵdaı kezinde tabysynan aıyrylǵan adamdarǵa 42 500 teńgeden kómek berilgen bolatyn. Ol aqsha memlekettik áleýmettik saqtandyrý qorynyń esebinen tólendi. Odan bólek, zań boıynsha qordan eńbekke jaramsyz bolyp qalý, asyraýshysynan aıyrylý, jumyssyz qalý, júktilik pen bosaný, jańa týǵan balany asyrap alý jáne bir jasqa deıin bala kútimine baılanysty áleýmettik tólemder beriledi. Qordyń áleýmetpen baılanys departamentiniń dırektory Gúlbaǵıla Bolatbekovanyń sózinshe, áleýmettik tólemdi taǵaıyndaý kezinde memlekettik áleýmettik saqtandyrý qory tekseris júrgizýge quqyly. Óıtkeni tótenshe jaǵdaı kezinde keıbir adamdar jumys istep, jalaqy alsa da, óz betinshe 42 500 teńgege ótinish jibergen.
"Áıeldiń jalaqy alǵany, sondaı-aq, bir mezgilde tótenshe jaǵdaı jáne (nemese) karantın kezeńine tólem alǵany anyqtalǵan jaǵdaıda alynǵan 42 500 teńge kólemindegi tólemdi erikti túrde qaıtarýy qajet", - deıdi Gúlbaǵıla Bolatbekova. Osy oraıda departament basshysy tótenshe jaǵdaı men karantın kezinde kirisinen aıyrylǵany týraly jalǵan málimet bergeni úshin ótinish berýshiniń ózi jaýapty ekenin eskertti. "Al, shynymen de, eńbek aqysy saqtalmaıtyn demalysta bolǵan jáne kórsetilgen kezeńde memlekettik áleýmettik saqtandyrý qorynan tólem alǵan ótinish berýshiler basqa tólemderge ótinish jibergende 42 500 teńgeni qaıtarmaıtynyn atap ótken jón", - deıdi Gúlbaǵıla Bolatbekova.
Ol bir jasqa deıin bala kútimine tólenetin járdemaqy qalaı esepteletinin de túsindirdi. Bolatbekovanyń sózinshe, tótenshe jaǵdaı bolǵan aılar esepten alynyp tastalady. Óıtkeni ol kezde adamnyń kirisi bolmaǵan. Sonyń ornyna aldyndaǵy aılardyń tabysy esepteledi. Osylaısha áıeldiń ortasha tabysy anyqtalady da, áleýmettik tólem taǵaıyndalady. Oǵan 12 aıdyń ishinde ótinish berýge bolady.
