سولتۇستىك قازاقستان وبلىسىندا بالالارىنىڭ تۇندە قاراۋسىز جۇرگەنى ءۇشىن 200-دەن استام اتا-انا جاۋاپكەرشىلىككە تارتىلدى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
سقو پد باستىعىنىڭ ءبىرىنشى ورىنباسارى قانات ايتباەۆتىڭ ايتۋىنشا، جىل باسىنان يۋۆەنالدىق پوليتسەيلەر وبلىس بويىنشا 60-تان استام رەيدتىك ءىس-شارالار وتكىزگەن. قاڭتار ايىندا پوليتسياعا كامەلەتكە تولماعان 319 ءجاسوسپىرىم جەتكىزىلىپتى. ونىڭ ىشىندە كامەلەتكە تولماعانداردىڭ تۇنگى ۋاقىتتا ءۇي-جايدان تىس جۇرگەنى ءۇشىن 210 زاڭدى وكىل جاۋاپكەرشىلىككە تارتىلدى. ءتۇرلى قۇقىق بۇزۋشىلىقتار ءۇشىن ءوڭىر اۋماعىندا سەگىز ءجاسوسپىرىم ەسەپكە قويىلىپتى.
بۇگىنگى تاڭدا پوليتسيانىڭ ەسەبىندە 190 ءجاسوسپىرىم تۇر. ولاردىڭ ارقايسىسىمەن پوليتسەيلەر مەن ۇستازدار جەكەلەي جۇمىستار جۇرگىزەتىن بولادى.
ايتا كەتەيىك، جىل باسىنان كامەلەتكە تولماعان بالالارىنا ءتيىستى تاربيە بەرمەي، نەمقۇرايلى قاراعانى ءۇشىن وبلىستا 82 اتا-انا جاۋاپقا تارتىلعان.
«ادىرنا» ۇلتتىق پورتالى
