پاۆلودارلىق پوليتسەيلەر 13 جىلدان بەرى بالاسىنا اليمەنت تولەۋدەن جالتارعان قالا تۇرعىنىن ۇستادى، دەپ حابارلايدى «ادىرنا» ءتىلشىسى Polisia.kz-كە سىلتەمە جاساپ.
اليمەنت تولەۋ بويىنشا مىندەتتەمەلەردى ورىنداماۋ ماسەلەسى ءبىزدىڭ ەلىمىزدە تەك وتباسىلىق ماسەلە ەمەس، سونداي-اق مەملەكەتتىك پروبلەما دا بولىپ تابىلادى. سوت شەشىمدەرىنە قاراماستان، اليمەنت تولەۋدەن جالتارعان جاۋاپسىز ازاماتتاردىڭ اليمەنت بويىنشا قارىزدارى جىل سايىن ارتىپ كەلەدى، ال كەيبىرەۋلەرى ايتارلىقتاي سوماعا جەتكەن.
پاۆلودار وبلىسى پوليتسيا دەپارتامەنتى باستىعىنىڭ ءبىرىنشى ورىنباسارى جاسقايرات قايىروۆ 2021 جىلدىڭ باسىنان بەرى ءوڭىر اۋماعىندا وسىنداي بەس فاكت تىركەلگەنىن ايتتى.
– مىسالى، كامەلەتكە تولماعان بالاسىن اسىراۋعا قاراجات تولەۋ تۇرىندەگى سوت شەشىمىن 13 جىل بويى ورىنداماعان پاۆلودار قالاسىنىڭ تۇرعىنى انىقتالدى. قازىرگى ۋاقىتتا اتالعان فاكت بويىنشا قازاقستان رەسپۋبليكاسى قىلمىستىق كودەكسىنىڭ 139-بابى (بالالارىن كۇتىپ-باعۋعا ارنالعان قاراجاتتى تولەۋ جونىندەگى مىندەتتەردى ورىنداماۋ، ەڭبەككە قابىلەتسىز اتا-انالارىن، ەڭبەككە قابىلەتسىز جۇبايىن (زايىبىن) كۇتىپ-باعۋعا ارنالعان قاراجاتتى تولەۋدەن جالتارۋ) بويىنشا سوتقا دەيىنگى تەرگەۋ جۇرگىزىلۋدە، – دەپ حابارلادى جاسقايرات قايىروۆ.
«ادىرنا» ۇلتتىق پورتالى
