13 اقپاننان باستاپ ەلىمىزدىڭ ازاماتتارىنا كولىكتى ءتيىستى قۇجاتتاردى الىپ جۇرمەي-اق، تەك جەكە كۋالىكپەن جۇرگىزۋىنە بولادى. بۇل تۋرالى IIM باسشىسى ەرلان تۇرعىمباەۆ Facebook جەلىسىندە جازدى، دەپ حابارلايدى «ادىرنا» ءتىلشىسى.
«مەملەكەت باسشىسى "قازاقستان رەسپۋبليكاسىنىڭ كەيبىر زاڭنامالىق اكتىلەرىنە جول ءجۇرىسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى" زاڭعا قول قويدى.
2019 جىلعى جەلتوقساندا ەل پرەزيدەنتى قاسىم-جومارت كەمەلۇلى توقاەۆ جۇرگىزۋشى قۇجاتتارىن اقپاراتتىق جۇيەلەر ارقىلى تەكسەرۋ، جۇرگىزۋشىلەرگە قۇجاتتاردىڭ قاعاز نۇسقالارىن وزىمەن بىرگە الىپ جۇرمەۋگە مۇمكىندىك بەرۋ تۋرالى ماسەلەنى كوتەرىپ، ءىىم-نە زاڭنامالىق اكتىلەرگە وزگەرىستەر مەن تولىقتىرۋلار ەنگىزۋدى تاپسىردى.
جاڭا زاڭ اعىمداعى جىلدىڭ 13 اقپانىنان باستاپ كۇشىنە ەنەدى.
بۇرىن قازاقستاندا جۇرگىزۋشى قۇجاتتارىنىڭ ءبىرىنىڭ جوقتىعى ءۇشىن ەسكەرتۋ (ەگەر العاش رەت بولسا) نەمەسە 5 اەك ءۇايىپپۇل قاراستىرىلعان بولاتىن.
ەندى جۇرگىزۋشىلەرگە كولىكتى جۇرگىزگەن كەزدە وزىمەن بىرگە تەك ءبىر عانا قۇجات - جەكە باسىن كۋالاندىراتىن كۋالىكتى الىپ ءجۇرۋ جەتكىلىكتى.
قازاقستاندا بەرىلگەن جۇرگىزۋشى كۋالىگىن، كولىك قۇرالىن تىركەۋ كۋالىگىن، ساقتاندىرۋ ءپوليسىن، سونداي-اق تەحنيكالىق بايقاۋدان وتكەنىن راستايتىن قۇجاتتى پوليتسەي پلانشەت ارقىلى تەكسەرەدى. ال ينتەرنەت جەلىسىنە قولجەتىمدىلىك جوق ەلدى مەكەندەردە جانە تاس جولداردا تەكسەرۋ راديوبايلانىس ارنالارى ارقىلى جۇزەگە اسىرىلاتىن بولادى.
جاڭا نورمالاردىڭ قازاقستاندىق جۇرگىزۋشى كۋالىگى جوق شەتەلدىكتەرگە جانە قازاقستاندا تىركەلمەگەن كولىك باسقارۋشىلارىنا قاتىسى جوق.
اۆتوكولىكتى جۇرگىزۋشى قۇجاتتارىنسىز باسقارۋدىڭ وسىنداي مۇمكىندىگى گرۋزيا، ۋكراينا، پولشا، لاتۆيا، ليتۆا سياقتى مەملەكەتتەردە بار، ول ەلدەردە دە ۇلتتىق زاڭناماعا ءتيىستى وزگەرىستەر ەنگىزىلگەن.
جۇرگىزۋشىلەردىڭ قۇجاتتارىن وزىمەن بىرگە الىپ ءجۇرۋ جانە جۇرگىزۋشى قۇجاتتارىن ۇسىنۋ مىندەتىن الىپ تاستاۋ - بۇل زاماناۋي تەحنولوگيالىق "سەرۆيستىك" پوليتسيانى دامىتۋعا باعىتتالعان تاعى ءبىر قادام.
مەملەكەت كولىكتى باسقارۋدى ەداۋىر جەڭىلدەتتى، بىراق جۇرگىزۋشىلەر باسقا جول قوزعالىسىنا قاتىسۋشىلاردىڭ قاۋىپسىزدىگى ءۇشىن جاۋاپكەرشىلىكتى ەستە ۇستاۋى كەرەك.
وسى مۇمكىندىكتى پايدالانا وتىرىپ، جۇرگىزۋشىلەردى دە، جاياۋ جۇرگىنشىلەردى دە جول ءجۇرىسى ەرەجەلەرى مەن كولىك جۇرگىزۋ مادەنيەتىن مۇلتىكسىز ساقتاۋعا شاقىرعىم كەلەدى»،-دەدى ول.
«ادىرنا» ۇلتتىق پورتالى
