قازاقستاننىڭ باس مەملەكەتتىك سانيتار دارىگەرى ەرلان قياسوۆ "كارانتيندىك شەكتەۋ شارالارى جانە ولاردى كەزەڭ-كەزەڭمەن جەڭىلدەتۋ تۋرالى" قاۋلىسىنا وزگەرىس ەنگىزدى، دەپ حابارلايدى "ادىرنا" ۇلتتىق پورتالى قازاقستان رەسپۋبليكاسىنىڭ دەنساۋلىق ساقتاۋ مينيسترلىگىنىڭ سانيتاريالىق-ەپيدەميولوگيالىق باقىلاۋ كوميتەتىنە سىلتەمە جاساپ.
وزگەرىستەر ءدىني نىساندارعا بايلانىستى بوپ وتىر. كوروناۆيرۋس ىندەتىنىڭ قاي ايماقتا قاتتى كۇشەيۋىنە قاراي بەلگىلى شەكتەۋلەر دە ەنگىزىلمەك.
"قىزىل" جانە "سارى" ايماقتاعى ءدىني نىسانداردا ادام جينالاتىن شارالاردى وتكىزۋگە تىيىم سالىنادى. "جاسىل" ايماقتاعى مەشىتتەرگە بەس نامازعا رۇقسات ەتىلەدى. مەشىت سىيىمدىلىعىنىڭ 30 پروتسەنتىنەن جانە ادام سانى 100-دەن اسپاۋى ءتيىس", - دەلىنگەن قاۋلىدا.
جۇما ناماز تەك اۋىل مەشىتتەرىندە عانا وتەدى. كەلۋشىلەر سانى عيمارات سىيىمدىلىعىنىڭ 25 پروتسەنتىنەن كوپ بولماۋى كەرەك.
كاۋلىدا ەلگە كەلۋشىلەرگە بايلانىستى شەكتەۋ شارالارى دا قامتىلعان.
شەكارا كەسىپ ءوتۋ كەزىندە ادامدار بەرىلگەن كۇننەن باستاپ ەسەپتەگەندە 3 تاۋلىك بۇرىن بەرىلگەن (قازاق نەمەسە ورىس نەمەسە اعىلشىن تىلدەرىندە) تەرىس ناتيجەسى بار انىقتاما ۇسىنۋعا مىندەتتى.
كىمدەر ءۇشىن مىندەتتى ەمەس:
5 جاسقا دەيىنگى بالالار (ولاردى ەرتىپ جۇرەتىن ادامداردا تەرىس ناتيجەسى بار انىقتاما بولسا);
قازاقستان رەسپۋبليكاسىنىڭ ۇكىمەتتىك دەلەگاتسيالارى;
اۆياكومپانيالار ەكيپاجى.
قاۋلىنىڭ تولىق نۇسقاسى قازاقستان رەسپۋبليكاسىنىڭ دەنساۋلىق ساقتاۋ مينيسترلىگىنىڭ سانيتاريالىق-ەپيدەميولوگيالىق باقىلاۋ كوميتەتىنىڭ رەسمي سايتىنان وقي الاسىز.
"ادىرنا"ۇلتتىق پورتالى
