اتىراۋدىڭ كىرەبەرىسىندەگى ارقايسىسى 300 ملن تەڭگەدەن استام قارجىعا سالىنعان، 3 پوليتسيا بەكەتى بوس تۇر. ونى كۇتىپ ۇستاۋ جۇمىستارىن، ەندى قالا اكىمدىگى سەنىمگەرلىك باسقارۋعا بەرۋگە تىرىسۋدا، دەپ حابارلايدى «ادىرنا» ءتىلشىسى «Astana TV» ارناسىنا سىلتەمە جاساپ.
2018-ءشى جىلى عانا سالىنعان ەكى قاباتتى نىسانداردىڭ جىلىتۋ قازاندىعى مەن ترانسفورماتورى بولەك. بەينەباقىلاۋ كامەراسى دا، كولىك تۇراعى دا بار. الايدا ايماق كاسىپكەرلەرى بۇل نىساندارعا قىزىعار ەمەس.
«2 رەت شىعاردىق. تەلەفون سوعىپ، حابارلاسىپ سۇراۋشىلار بار. ەكى-ءۇش ادام سۇرادى. وسىنداي نىسان شىعىپتى، قاتىسايىق،- دەپ ەدىك دەپ. الايدا تەندەرگە شىعارىلعان ۋاقىتتا ەشكىم قىزىعۋشىلىق تانىتپاي وتىر. سول سەبەپتى ءۇشىنشى رەت شىعارىپ وتىرمىز»،-دەدى اتىراۋ قالاسى اكىمدىگى قارجى ءبولىمىنىڭ ورىنباسارى گۇلحان عالىمجانوۆا.
قىزىقپاۋدىڭ دا بىرنەشە سەبەبى بار سياقتى. ويتكەنى شەندىلەر كاسىپكەرلەرگە نىساننىڭ بارلىق شىعىنىن كوتەرىپ قانا قويماي، توتەنشە جاعداي بولا قالعان جاعدايدا 24 ساعات ىشىندە بوساتىپ بەرۋدى تالاپ ەتىپ وتىر. ونىڭ ۇستىنە عيماراتتان كورگەن جىلدىق پايداسىنىڭ بەلگىلى ءبىر بولىگىن قالا قازىناسىنا بەرۋدى مىندەتتەيدى. قوماقتى قارجىعا سالىنعان زاماناۋي عيماراتتى جەرگىلىكتى پوليتسيا پايدالانىپ تا ۇلگەرگەن جوق. ءىىم سىبايلاس جەمقورلىققا قارسى ارەكەتتەرىن جۇزەگە اسىرۋ جوسپارى اياسىندا، 2019 جىلى بەكەتتەردى جاپپاي الىپ تاستاعان ەدى.
ايتا كەتەيىك، بۇل بەكەتتەر وتكەن جازدا كۇشەيتىلگەن كارانتين كەزىندە بلوك-بەكەت رەتىندە پايدالانىلدى.
«ادىرنا» ۇلتتىق پورتالى
