Facebook الەۋمەتتىك جەلىسىندەگى «مەنىڭ مەكتەبىم» توبىندا اسحات اليموۆ: «بولاشاقتا جۇمىسقا تۇرۋ ءۇشىن بۇگىنگى تۇيىندەمەلەردىڭ (رەزيۋمە) ورنىنا ارقايسىمىزدىڭ «تسيفرالىق ءىزىمىز» قولدانىستا بولادى دەگەن بولجاۋ ايتىلادى. ياعني، ءبىزدىڭ قانداي الەۋمەتتىك جەلىلەرگە كىرىپ، وندا نە وقىپ، نە قاراپ، نە جازعاندارىمىز، ينتەرنەتتە قانداي سايتتارعا كىرىپ، قانداي ماتەريالداردى ىزدەگەنىمىز، قاراعانىمىز نە وقىعانىمىز، ولار تۋرالى قانداي پىكىر قالدىرعانىمىز (نە قالدىرماعانىمىز دا) ءبىزدىڭ تانىمدىق جانە كاسىبي دەڭگەيلەرىمىزدى ايعاقتايتىن بولادى. جۇمىسقا تۇرعاندا، كەز كەلگەن جۇمىس بەرۋشى ارنايى سايتقا كىرىپ، جۇمىسقا تۇرعىسى كەلگەن ادام تۋرالى وسىنداي مالىمەتتەرمەن تانىسا الادى» دەگەن جازبا جاريالادى. سونىمەن قاتار ول مۇعالىمدەردىڭ كوبىنەسە قانداي پىكىر جازىپ، نەگە «لايك» قوياتىندارىنا دا تاجىريبە جاساعانىن ايتادى. قورىتا ايتقاندا، اسحات اليموۆ مۇعالىمدەرگە الەۋمەتتىك جەلىلەردە جازاتىن پىكىرلەرىنە مۇقيات بولۋعا شاقىرادى. مۇعالىمنىڭ «تسيفرالىق ءىز» تۋرالى بولجامى نە ءۇشىن ايتىلعانى تۇسىنىكسىز. دەسەك تە، وسى جازبانى قولداپ، «دۇرىس» دەيتىندەر دە جوق ەمەس ەكەن. جازبانىڭ استىنا قالدىرىلعان جۇزدەگەن پىكىر وسىنىڭ دالەلى ىسپەتتەس. الايدا، بۇل جازبانىڭ نەگىزگى استارىنا باس نازار اۋدارعان ەلىمىزدەگى مۇعالىمدەرگە قاتىستى ءاربىر ادىلەتسىز جاعدايلارمەن كۇرەسىپ، قۇقىقتىق كومەك كورسەتىپ جۇرگەن مۇعالىم ايمان ساعيدۋللانىڭ جاۋابى تومەندەگىدەي:
«مۇعالىم دە جانى مەن جۇرەگى بار ادام. قوعامداعى بولىپ جاتقان جاعدايعا ارالاسپاسا، ول نەسىنە مۇعالىم؟ مۇعالىم تەك قانا "ليسسون ستادي، سينگاپۋر" دەپ ارمانداپ وتىراتىن ماماندىق ەمەس. مۇعالىم ءوز ەلىنە، حالقىنا جانى اشىپ، ءار ماسەلەسىن ءتۇسىنىپ وتىراتىن ادام. ەلدىڭ ماسەلەسىنە ارالاسىپ، ءوز ويىن ايتا الماسا، مۇعالىم بولۋدىڭ نە كەرەگى بار؟
تاڭ قالاتىنىم، سول جازباعا كوپ مۇعالىمدەر قولداۋ ءبىلدىرىپتى. تۇسىنبەي قولداي سالعان با، الدە بولاشاقتا الەۋمەتتىك جەلىدەگى پىكىرىمىزدى، كىرگەن سايتىمىزدى ديرەكتوردىڭ تەكسەرىپ بولىپ، جۇمىسقا الۋىن قولداپ وتىر ما؟
الاڭداماڭىزدار! بولاشاقتا ونداي بولمايدى. ءسوز بوستاندىعى بار. ءبىز دە جانى مەن جۇرەگى بار ادامبىز. مۇعالىمنىڭ قانداي پىكىر جازاتىنىن ولشەپ بەرەتىندەي ەشكىمنىڭ قۇقىعى جوق.ءتىرى بولساق وندايعا جول بەرمەيمىز. كەلەسى جولى بىرەۋدى قولدايتىن كەزدە جازبانى دۇرىستاپ وقىڭىزدار. ايتپەسە مينيستر :"حالىق قولداپ وتىر،"-دەپ ادەپ قاعيداسىنا ەنگىزىپ جىبەرمەسىن».
مۇقاش مۇراتۇلى،
«ادىرنا» ۇلتتىق پورتالى.
