رەسەيدىڭ قازاقستاننان اجىراعىسى جوق

2209
Adyrna.kz Telegram

رەسەي سەناتورى الەكسەي پۋشكوۆ «ۆەچەرنيايا موسكۆا» گازەتىنە بەرگەن سۇحباتىندا دجو بايدەننىڭ پرەزيدەنتتىگى تۇسىندا اقش پوستكەڭەستىك رەسپۋبليكالار ءۇشىن كۇرەسىن كۇشەيتەدى دەگەن پىكىر ءبىلدىردى دەپ جازادى «ادىرنا» ۇلتتىق پورتالى Abai.kz.-كە سىلتەمە جاساپ.

ونىڭ ايتۋىنشا، امەريكا قازىر پوستكەڭەستىك رەسپۋبليكالاردى رەسەيدەن ءبولىپ الىپ، اجىراتۋعا باعىتتالعان جۇمىستار جۇرگىزىپ جاتىر-مىس.

«پوستكەڭەستىك كەڭىستىكتەگى باسەكەلەستىك كۇشەيىپ كەلەدى. ەگەر بۇل ترامپ ءۇشىن ونشا قىزىعۋشىلىق تۋدىرماسا، وندا بايدەن اكىمشىلىگى پوستكەڭەستىك رەسپۋبليكالاردى رەسەيدەن ءبولىپ تاستاۋعا باعىتتالعان امەريكانىڭ كۇش-جىگەرىنە ءباس تىگىپ جاتقان كورىنەدى»، - دەدى ول.

ول سونداي-اق، اقش ەندى بەلورۋسسياعا، وزبەكستانعا، ارمەنياعا جانە قازاقستانعا نازار اۋدارادى دەگەندى ايتقان.

«ولار اقش-تىڭ نازارىندا بولادى. ءتىپتى، كيەۆپەن اسكەري ىنتىماقتاستىق كۇشەيۋى، اقش-تان قارۋ-جاراق پەن تەحنيكا الۋى جانە ۋكراينا اۋماعىندا اقش-تىڭ اسكەري بازاسى ورنالاستىرىلۋى مۇمكىن. ۆاشينگتون مەن كيەۆ باتىس اسكەري قۇرىلىمدارى بويىنشا كۇش بىرىكتىرۋى عاجاپ ەمەس. سول ارقىلى ونى ناتو-نىڭ بەيرەسمي مۇشەسى ەتۋى دە مۇمكىن. 

بايدەننىڭ كەزىندە اقش رەسەيمەن باسەكەلەستىكتى پوستكەڭەستىك كەڭىستىكتە جۇرگىزۋى اقش-پەن قارىم-قاتىناستى ناشارلاتۋدىڭ جاڭا فاكتورىنا اينالۋى مۇمكىن. سوندىقتان، ءبىز دە سوعان قاراي جۇمىس جاساۋىمىز كەرەك»، - دەپتى.

سوڭعى كەزدەرى، رەسەي ساياساتكەرلەرى قازاقستان مەن بۇرىنعى پوستكەڭەستىك ەلدەرگە قاتىستى وسى سەكىلدى مالىمدەمەلەردى جيىلەتتى. بىلتىر جەلتوقساندا رف مەملەكەتتىك دۋماسىنىڭ دەپۋتاتتارى ۆ.نيكونوۆ پەن ە.فەدەروۆ قازاقستاننىڭ تاۋەلسىزدىگى مەن تەرريتوريالىق تۇتاستىعىن مويىندامايتىن مالىمدەمەلەر جاساعان. كەيىن بۇل داۋ مەملەكەتارالىق دەڭگەيدە جالعاسىپ، بارىپ تىنشىعانداي بولعان.

پىكىرلەر