ۇرپاق تاربيەسىندە ونەگە كورسەتىپ كەلە جاتقان بۇل اۋلەتتىڭ التىن دىڭگەگى – «التىن القا» يەگەرى، كوپبالالى انا دۋلداي سارحاد. ارداقتى انا 9 ۇل، 4 قىز تاربيەلەپ ءوسىرىپ، بۇگىندە 41 نەمەرە، 32 شوبەرە ءسۇيىپ وتىر.
ادياتتار اۋلەتى – ەلگە ەڭبەگىمەن تانىلعان، ءبىلىم مەن ەڭبەككە ەرەكشە ءمان بەرەتىن ونەگەلى وتباسى. اۋلەت قۇرامىندا 19 ۇستاز بەن 3 دارىگەر حالىققا قىزمەت ەتۋدە. سونىمەن قاتار كاسىپكەرلىك، اۋىل شارۋاشىلىعى، سپورت جانە ءبىلىم سالاسىندا تابىستى ەڭبەك ەتىپ جۇرگەن ازاماتتار كوپ.
اۋلەتتىڭ نەمەرەلەرى دە ءتۇرلى سالالاردا جەتىستىككە جەتىپ، رەسپۋبليكا جانە حالىقارالىق دەڭگەيدەگى جارىستاردىڭ جەڭىمپازدارى اتانىپ ءجۇر.
بۇگىن ادياتتار وتباسى ەل بولاشاعىنا بەيجاي قاراماي، رەفەرەندۋمعا وتباسىمەن كەلىپ داۋىس بەرىپ، ازاماتتىق بەلسەندىلىكتىڭ ۇلگىسىن كورسەتتى.
اۋلەتتىڭ ۇيىتقىسى سارحاد اجەي ءوز پىكىرىندە:
«قازاق ەلى – الەمدەگى ەڭ بەيبىت، بەرەكەسى تاسىعان باقىتتى ەل. مەن وسىنشاما نەمەرە-شوبەرەممەن بىرگە رەفەرەندۋمعا كەلگەنىمە اللاعا مىڭ دا ءبىر شۇكىرلىك ەتەمىن. وسى ۇرپاعىمنىڭ بولاشاعى جارقىن بولسىن دەپ داۋىس بەرۋگە كەلدىم. “ەلۋ جىلدا – ەل جاڭا” دەگەندەي، جاڭا قازاقستاننىڭ جاڭا زاڭى قايتا پىسىقتالىپ جاتىر. ءبىز اۋلەتىمىزبەن بۇل وزگەرىستى قولدايمىز»، – دەدى.
