Reseı senatory Alekseı Pýshkov «Vechernıaıa Moskva» gazetine bergen suhbatynda Djo Baıdenniń prezıdenttigi tusynda AQSh postkeńestik respýblıkalar úshin kúresin kúsheıtedi degen pikir bildirdi dep jazady «Adyrna» ulttyq portaly Abai.kz.-ke silteme jasap.
Onyń aıtýynsha, Amerıka qazir postkeńestik respýblıkalardy Reseıden bólip alyp, ajyratýǵa baǵyttalǵan jumystar júrgizip jatyr-mys.
«Postkeńestik keńistiktegi básekelestik kúsheıip keledi. Eger bul Tramp úshin onsha qyzyǵýshylyq týdyrmasa, onda Baıden ákimshiligi postkeńestik respýblıkalardy Reseıden bólip tastaýǵa baǵyttalǵan Amerıkanyń kúsh-jigerine bás tigip jatqan kórinedi», - dedi ol.
Ol sondaı-aq, AQSh endi Belorýssııaǵa, Ózbekstanǵa, Armenııaǵa jáne Qazaqstanǵa nazar aýdarady degendi aıtqan.
«Olar AQSh-tyń nazarynda bolady. Tipti, Kıevpen áskerı yntymaqtastyq kúsheıýi, AQSh-tan qarý-jaraq pen tehnıka alýy jáne Ýkraına aýmaǵynda AQSh-tyń áskerı bazasy ornalastyrylýy múmkin. Vashıngton men Kıev batys áskerı qurylymdary boıynsha kúsh biriktirýi ǵajap emes. Sol arqyly ony NATO-nyń beıresmı múshesi etýi de múmkin.
Baıdenniń kezinde AQSh Reseımen básekelestikti postkeńestik keńistikte júrgizýi AQSh-pen qarym-qatynasty nasharlatýdyń jańa faktoryna aınalýy múmkin. Sondyqtan, biz de soǵan qaraı jumys jasaýymyz kerek», - depti.
Sońǵy kezderi, Reseı saıasatkerleri Qazaqstan men burynǵy postkeńestik elderge qatysty osy sekildi málimdemelerdi jıiletti. Byltyr jeltoqsanda RF Memlekettik Dýmasynyń depýtattary V.Nıkonov pen E.Federov Qazaqstannyń Táýelsizdigi men terrıtorııalyq tutastyǵyn moıyndamaıtyn málimdemeler jasaǵan. Keıin bul daý memleketaralyq deńgeıde jalǵasyp, baryp tynshyǵandaı bolǵan.
