قاراعاندى رەسەيدىڭ پروۆينتسياسى ما؟

4169
Adyrna.kz Telegram

ەلىمىزدە اقپارات قاۋىپسىزدىگى ساقتالماي وتىر. وعان كۇندەلىكتى كوزىمىز كورىپ، قۇلاعىمىز ەستىپ جۇرگەن «تەلەجاشىكتەگى» كورىنىستەر كۋا.

باستى «وتاۋ تۆ» وتاندىق ساندىق اقپارات تاراتۋشى جانە باسقا دا كابەلدى وپەراتورلارى كوبىنەسە رەسەي ارنالارىن كورەرمەن نازارىنا ۇسىنۋدان جالىقپاي كەلەدى. بۇل قالىپتى تەندەنتسياعا اينالدى. كورشى مەملەكەتتىڭ جاڭالىقتارىن كوپشىلىك قاۋىمعا جەتكىزە وتىرا، وزگە ەلدىڭ سانانى ۋلايتىن تەرىس ساياساتىن بىزگە ناسيحاتتاۋدا. اسىرەسە «رەسەي 24» اي-كۇننىڭ امانىندا تىكەلەي ەفيردە اسىرەۇلتشىل ۆلاديمير جيرينوۆسكيدىڭ قازاقستاننىڭ كەيبىر وبلىسىن رەسەيگە قوسىپ الۋ تۇرعىسىنداعى، مەملەكەتىمىزدىڭ تۇتاستىعىنا نۇقسان كەلتىرەتىن داكپىرت مالىمدەمەلەرىن تاراتىپ، ەل ىشىندە ۇلتارالىق نارازىلىقتى تۋعىزۋعا اسەر ەتۋدە. وعان ۆلاديمير سولوۆەۆتىڭ قازاقستان تۋرالى شوۆينيستىك پيعىلداعى سوزدەرىن قوسىپ قويىنىز. ارينە، سونى كورىپ ەستىگەن وزگە ۇلت ازاماتتارىنىڭ ەلىمىزگە دەگەن «وزگەشە ويىنىڭ» پايدا بولاتىنى شىندىق.

اتالعان جايتتاردان قاراعاندى قالاسى دا قالىس قالماي كەلەدى. ماسەلەن، وسىنداعى جەكەمەنشىك «5 ارنا» 15 جىلدان استام ۋاقىت ايماعىمىزعا «رەسەي 1» تەلەارناسىنا رەترانسلياتسيا جاساپ كەلەدى. كۇن ۇزاق ورىسشا كونتسەرت، توك شوۋلار، ويىن ساۋىق باعدارلامالارىن ۇزبەي كورسەتۋدە. ەڭ وكىنىشتىسى سول، ارنانىڭ ءار جۇمىس كۇنى كەشكە پرايم-تايم ۋاقىتىندا رەسەيلىك «ۆەستي» جاڭالىقتارىن بەرىپ وتىراتىنى كوڭىلگە كىربىڭ  ۇيالاتادى. ول از بولعانداي، ءار اپتانىڭ سوڭىندا «ۆەستي نەدەلي» اپتالىق قورىتىندى ساراپتامالىق باعدارلاماسى كورەرمەن قاۋىمعا جول تارتۋدا. وسىدان 1-2 جىل بۇرىن دونباسس سەپاراتيستەرىنىڭ ۋكرايناعا قارسى سوعىسقا شاقىرعان حابارى شىعىپ، بەسىنشى ارنا باسى ۇلكەن داۋعا قالىپ، جەرگىلىكتى كورەرمەن نارازىلىعىن تۋعىزعان ەدى.

سوندا نە، كورشى ەلدىڭ حابارىن تاڭ اتقاننان قاس قارايعانشا كورەتىندەي، قاراعاندى رەسەيدىڭ پروۆينتسياسى ما؟

اتالعان جايتتاردى كورە-بىلە تۇرا، ءوڭىرىمىزدىڭ اقپارات سالاسىنا جاۋاپتى باسشىلارى، قاراعاندى وبلىسى اكىمىنىڭ يدەولوگياعا جاۋاپتى ورىنباسارى ابزال نۇكەن، وبلىستىق ىشكى ساياسات باسقارماسىنىڭ باسشىسى ەرلان قۇسايىن مىرزالار قايدا قاراپ وتىر؟ بۇل ولاردىڭ جۇمىسىنا ۇلكەن سىن. اتام قازاق ايتادى «سىن تۇزەلمەي، ءمىن تۇزەلمەيدى» دەپ. ەڭ باستىسى، ارقايسىمىز ءوز ەلىمىزدە ءومىر ءسۇرىپ جۇرگەنىمىزدى سەزىنسەك بولدى الەۋمەت.

دارحان ۋاليەۆ,

قازاقستان جۋرناليستەر وداعىنىڭ مۇشەسى.

پىكىرلەر