بىشكەك قالاسىندا حالىقارالىق تۇركى اكادەمياسىنىڭ ۇيىمداستىرۋىمەن وتكەن «جامبىل - قازاق-قىرعىزعا ورتاق اقىن» اتتى القالى جيىن اياسىندا قازاقشا-قىرعىزشا كىتاپتاردىڭ تۇساۋكەسەر ءراسىمى جاسالدى. اتاپ ايتقاندا، تۇركى اكادەمياسى ازىرلەگەن قىرعىز حالقىنىڭ ايگىلى «ماناس» ەپوسىنىڭ قازاقشا نۇسقاسى كوپشىلىك نازارىنا ۇسىنىلدى. داستاندى قازاقشا جىرلاعان بەلگىلى ماناسشى، اقىن بايانعالي ءالىمجانوۆ. سونىمەن قاتار، اكادەميا باسپاعا دايىنداعان اباي قۇنانبايۇلىنىڭ تاڭدامالى شىعارمالارى توپتاستىرىلعان قىرعىز تىلىندەگى اكادەميالىق جيناعى دا وقىرمانعا جول تارتتى. اتالعان جيناققا ەنگەن اباي ولەڭدەرىنىڭ قىرعىزشا اۋدارىلۋىنا كەريمبەك كادىراكۋنوۆ پەن تۋگولباي كازاكوۆ ەلەۋلى ۇلەس قوستى. وسى ورايدا اكادەميا باسشىسى اباي مۇرالارىن قىرعىز تىلىنە اۋدارعان اۋدارماشىلاردى تۇركى اكادەمياسىنىڭ ارنايى مەدالدارىمەن ماراپاتتادى.
ايتا كەتۋ كەرەك، بىلتىر باكۋ قالاسىندا وتكەن تۇركى اكادەمياسىنىڭ عىلىمي كەڭەسىندە 2020 جىلعى تۇركى الەمىنىڭ اتاۋلى داتالارى قاتارىندا Maناس داستانىنىڭ 1125 جىلدىعى مەن اباي قۇنانبايۇلىنىڭ 175 جىلدىعىن اتاپ ءوتۋ بەكىتىلگەن ەدى. اكادەميا جىل بويى وسى مەجەلى داتالارعا ارناپ بىرقاتار حالىقارالىق شارالار وتكىزگەن بولاتىن.
ۇيىمداستىرۋشى:
حالىقارالىق تۇركى اكادەمياسى،
بايلانىس تەلەفونى 57-49-83
