Bishkek qalasynda Halyqaralyq Túrki akademııasynyń uıymdastyrýymen ótken «Jambyl - qazaq-qyrǵyzǵa ortaq aqyn» atty alqaly jıyn aıasynda qazaqsha-qyrǵyzsha kitaptardyń tusaýkeser rásimi jasaldy. Atap aıtqanda, Túrki akademııasy ázirlegen qyrǵyz halqynyń áıgili «Manas» eposynyń qazaqsha nusqasy kópshilik nazaryna usynyldy. Dastandy qazaqsha jyrlaǵan belgili manasshy, aqyn Baıanǵalı Álimjanov. Sonymen qatar, Akademııa baspaǵa daıyndaǵan Abaı Qunanbaıulynyń tańdamaly shyǵarmalary toptastyrylǵan qyrǵyz tilindegi akademııalyq jınaǵy da oqyrmanǵa jol tartty. Atalǵan jınaqqa engen Abaı óleńderiniń qyrǵyzsha aýdarylýyna Kerımbek Kadyrakýnov pen Týgolbaı Kazakov eleýli úles qosty. Osy oraıda Akademııa basshysy Abaı muralaryn qyrǵyz tiline aýdarǵan aýdarmashylardy Túrki akademııasynyń arnaıy medaldarymen marapattady.
Aıta ketý kerek, byltyr Baký qalasynda ótken Túrki akademııasynyń Ǵylymı keńesinde 2020 jylǵy Túrki áleminiń ataýly datalary qatarynda Manas dastanynyń 1125 jyldyǵy men Abaı Qunanbaıulynyń 175 jyldyǵyn atap ótý bekitilgen edi. Akademııa jyl boıy osy mejeli datalarǵa arnap birqatar halyqaralyq sharalar ótkizgen bolatyn.
Uıymdastyrýshy:
Halyqaralyq Túrki akademııasy,
baılanys telefony 57-49-83
