سەمەيدە ماسكا تاقپاي سۋرەتكە تۇسكەن قالالىق ءماسليحات دەپۋتاتتارىنا سانيتارلىق نورمالاردى بۇزعانى ءۇشىن ايىپپۇل سالىندى. بۇل تۋرالى قالالىق سانيتارلىق-ەپيدەميولوگيالىق باقىلاۋ باسقارماسىنداعىلار مالىمدەدى، - دەپ حابارلايدى «ادىرنا» ۇلتتىق پورتالى Tengrinews.kz تىلشىسىنە سىلتەمە جاساپ.
ۆەدومستۆو باسشىسى بەرىك تىلەبالديننىڭ ايتۋىنشا، ايىپپۇل سانكتسيالارى رەزونانس تۋدىرعان سۋرەتتەگى بارلىق ادامعا سالىنعان.
"سانيتارلىق تالاپتاردى بۇزعان جەكە تۇلعا رەتىندە اركىم ايىپپۇل تولەۋى كەرەك. ايىپپۇل سوماسى - 30 اەك، بۇل شامامەن 85 000 تەڭگە", - دەدى قالانىڭ باس سانيتار دارىگەرى.
دەپۋتاتتاردان باسقا، فوتودا بىرنەشە شەنەۋنىك، ونىڭ ىشىندە قالا اكىمى ەرماك ءسالىموۆ پەن ونىڭ ورىنباسارى ايدار سادىرباەۆ تا بار. ولار دا دەپۋتاتتار سياقتى جاۋاپكەرشىلىككە تارتىلدى.
بەرىك تىلەبالدين ايىپپۇل تولەۋگە ءبىر اي بەرىلەتىنىن ءتۇسىندىردى. الايدا، ەگەر جەتى كۇن ىشىندە تولەسە، ايىپپۇل سوماسىنىڭ جارتىسىن ۇنەمدەۋگە بولادى.
الەۋمەتتىك جەلىدە كەيبىر دەپۋتات سۋرەتتىڭ سالدارى تۋرالى جازىپ جاتىر.
"ماسكا جوق سۋرەت ءۇشىن ايىپپۇل تولەۋ تۇبىرتەگىن العاننان كەيىن الداعى دۇيسەنبىدە بىردەن تولەيمىن", - دەپ جازدى دەپۋتات ارمان ماشيموۆ.
ال "اۋىل" پارتياسىنان سايلانعان ءماسليحات دەپۋتاتى قايرات سماعۇلوۆ ايىپپۇلدى تولەپ قويىپتى. بۇل تۋرالى ول ءوزىنىڭ Facebook جەلىسىندەگى پاراقشاسىندا حابارلادى. تەك دەپۋتات پوستقا نۇر-سۇلتانداعى پارلامەنت ءماجىلىسىنىڭ جالپى وتىرىسىندا تۇسكەن سۋرەتىن جۇكتەپتى.
ۇجىمدىق فوتودا مەملەكەت باسشىسى مەن دەپۋتاتتىق فراكتسيالاردىڭ باسشىلارى بار. جالپى جۇزگە جۋىق ادام. ءبارى ماسكاسىز جانە الەۋمەتتىك قاشىقتىقتى ساقتاماعان.
"مەن ايىپپۇل تولەدىم، ال ءسىز شە؟" - دەپ جازدى سەمەي دەپۋتاتى.
ەسكە سالايىق، وتكەن اپتادا سەمەيدە ماسكا تاقپاي سۋرەتكە تۇسكەن دەپۋتاتتار جەلىدە قىزۋ تالقىلاندى. سەمەيدىڭ ءماسليحات حاتشىسى بەيسەنبەك اقجالوۆتىڭ ايتۋىنشا، دەپۋتاتتار تەك ەكى رەت سۋرەتكە تۇسكەن. بىرىنشىسىندە ماسكامەن وتىرعان.
