Semeıde maska taqpaı sýretke túsken qalalyq máslıhat depýtattaryna sanıtarlyq normalardy buzǵany úshin aıyppul salyndy. Bul týraly qalalyq sanıtarlyq-epıdemıologııalyq baqylaý basqarmasyndaǵylar málimdedi, - dep habarlaıdy «Adyrna» ulttyq portaly Tengrinews.kz tilshisine silteme jasap.
Vedomstvo basshysy Berik Tilebaldınniń aıtýynsha, aıyppul sankııalary rezonans týdyrǵan sýrettegi barlyq adamǵa salynǵan.
"Sanıtarlyq talaptardy buzǵan jeke tulǵa retinde árkim aıyppul tóleýi kerek. Aıyppul somasy - 30 AEK, bul shamamen 85 000 teńge", - dedi qalanyń bas sanıtar dárigeri.
Depýtattardan basqa, fotoda birneshe sheneýnik, onyń ishinde qala ákimi Ermak Sálimov pen onyń orynbasary Aıdar Sadyrbaev ta bar. Olar da depýtattar sııaqty jaýapkershilikke tartyldy.
Berik Tilebaldın aıyppul tóleýge bir aı beriletinin túsindirdi. Alaıda, eger jeti kún ishinde tólese, aıyppul somasynyń jartysyn únemdeýge bolady.
Áleýmettik jelide keıbir depýtat sýrettiń saldary týraly jazyp jatyr.
"Maska joq sýret úshin aıyppul tóleý túbirtegin alǵannan keıin aldaǵy dúısenbide birden tóleımin", - dep jazdy depýtat Arman Mashımov.
Al "Aýyl" partııasynan saılanǵan máslıhat depýtaty Qaırat Smaǵulov aıyppuldy tólep qoıypty. Bul týraly ol óziniń Facebook jelisindegi paraqshasynda habarlady. Tek depýtat postqa Nur-Sultandaǵy Parlament Májilisiniń jalpy otyrysynda túsken sýretin júktepti.
Ujymdyq fotoda Memleket basshysy men depýtattyq frakııalardyń basshylary bar. Jalpy júzge jýyq adam. Bári maskasyz jáne áleýmettik qashyqtyqty saqtamaǵan.
"Men aıyppul tóledim, al siz she?" - dep jazdy Semeı depýtaty.
Eske salaıyq, ótken aptada Semeıde maska taqpaı sýretke túsken depýtattar Jelide qyzý talqylandy. Semeıdiń máslıhat hatshysy Beısenbek Aqjalovtyń aıtýynsha, depýtattar tek eki ret sýretke túsken. Birinshisinde maskamen otyrǵan.
