امەريكانىڭ حالىقارالىق قاتىناستار جانە الدىن الا ساقتاندىرۋ ورتالىعىنىڭ ساراپشىلارى 2021 جىلى ۋكراينا مەن رەسەي اراسىندا اسكەري قاقتىعىس بولۋى مۇمكىن ەكەندىگىن بولجاپ وتىر.
امەريكالىق ماماندار بيىل الەمدە بولۋى ىقتيمال وتىزعا جۋىق اسكەري قاقتىعىستاردىڭ نۇكتەلەرىن اتاپ كورسەتكەن.
ءبىرىنشى اسكەري قاقتىعىستاردىڭ بولۋ ىقتيمالدىعى وتە جوعارى ايماقتار، بۇل ءتىپتى امەريكانىڭ مۇددەسىنە، قاۋىپسىزدىگىنە نۇقسان كەلتىرەدى. ەكىنشى توپقا جاتاتىندار – قىزعىلت سارى ايماقتار، بۇل سوعىسقا يتەرمەلەيتىن نۇكتەلەرگە جاتادى. ءۇشىنشى توپتاعىلار –سارى ايماق، ونىڭ ۆاشينگتونعا اسا قاۋپى جوق.
امەريكالىق كەڭەستىڭ ساراپشىلارى دونباسس اۋماعىندا ەگەر ۋكراينا مەن رەسەي ناقتى شەشىمگە كەلمەسە، اسكەري قاقتىعىستاردىڭ ورىن الۋ مۇمكىندىگىن جوققا شىعارمايدى. ازىگە مۇنىڭ شەشىلەتىن ءتۇيىنى بايقالمايدى. سوندىقتان ساراپشىلار ءتىپتى بيىلدىڭ وزىندە دونباسس اۋماعىندا اسكەري قاقتىعىس بولۋى مۇمكىن دەپ وتىر. رەسەي مەن ۋكراينا اراسىنداعى قاقتىعىسقا رەسمي ۆاشينگتون سىرتتان ەلەۋسىز قاراپ وتىرا المايدى. بۇل جاعداي ورىن الا قالسا، اقش-قا جاناما تۇردە بولسا دا اسەر ەتەدى.
اتاپ ايتۋ كەرەك، امەريكالىق كەڭەستىڭ بايانداماسىندا كوپتەگەن ساراپشىلار ۋكراينا مەن رەسەي اراسىندا ءتۇيىنى ءازىر شەشىلمەگەن ارازدىقتا تۇبىندە تاعى دا اسكەري قاقتىعىس بولۋى مۇمكىن ەكەندىگىن جوققا شىعارماعان. مۇنداي جاعدايدا اقش ءوز مۇددەسى ءۇشىن سىرتقى قاقتىعىستارعا ارالاسۋعا تۋرا كەلەتىنىن دە جاسىرماعان.
راسىندا دا بيلىككە بايدەن كەلگەننەن كەيىن امەريكا سىرتقى ەلدەردە ءوز مۇددەسىن كۇشەيتۋ تۇرعىسىندا قايتادان باتىل شارالاردى جۇزەگە اسىرۋى مۇمكىن. ارينە بۇل حالىقارالىق ساياسي جاعدايدى شيەلەنىستىرە تۇسەدى.
ەركىن قالدان، «ادىرنا» ۇلتتىق پورتالى
