سايراگۇل ساۋىتباي تۋرالى روليك پە، الدە قىسقا مەتراجدى فيلم بە، سونداي بىردەڭە كوردىم. سوندا ول ەكى ەلدەگى دەموكراتيانى، ازيا مەن ەۋروپانى، قازاقستان (نەمەسە قىتاي) مەن شۆەتسيانى سالىستىرادى، ءبىزدىڭ قانشالىقتى ارتتا قالعانىمىزعا ءىشى ۋداي اشيدى. بالتىق تەڭىزىنىڭ جاعالاۋىندا ەمىن-ەركىن قىدىرىستاپ ءجۇر، ەشكىم مازالامايدى. جۇمىسقا تۇرۋ ءۇشىن شۆەد ءتىلىن ءبىلۋى كەرەك ەكەن، قازىر ءبىرشاما ۇيرەنىپ قالعان. اسىرەسە بالالار تەز ۇيرەنۋدە دەيدى. ءتىل ۇيرەنۋ كۋرسى، جاتاتىن جەرى، تاماعى - ءبارى تەگىن.
ەلىم دەپ ارىپ-اشىپ، شەكارانى بۇزىپ-جارىپ كەلگەندە ءبىز وڭمەنىنەن كەرى يتەرىپپىز. ايتەۋىر قىتايعا كەرى ۇستاپ بەرمەپپىز، بىراق بوسقىن مارتەبەسىن دە بەرمەپپىز. ول دەگەن... كەز-كەلگەن ۋاقىتتا، ابىر-سابىر، اجيوتاج باسىلىپ، سايابىرسىعاندا كەرى قايتارىپ جىبەرۋ دە مۇمكىن دەگەن ءسوز عوي، ۇنەمى قورقىنىشتا قالاي ءومىر سۇرەرسىڭ، ول مۇمكىن ەمەس قوي.
ول دا ەشتەڭە ەمەس، مەنىڭ جۇرەگىمدى اۋىرتقانى - مەن وسىندا جاقسى ءومىر ءسۇرىپ جاتسام دا قىتايدا قالعان باۋىرلارىمدى، جازىقسىز جانداردى ويلاعاندا، ەش كىناسى جوق تۇرمەگە توعىتىلعانداردىڭ جاۋتەڭدەگەن كوز-جانارلارى كوز الدىما كەلگەندە ءوزىمدى قويارعا جەر تاپپايمىن دەگەنى بولدى. مىنە شىن جاناشىر ادامنىڭ ءسوزى. شەتەلدە جۇرسە دە ول تولىق باقىتتى بولا المايدى، ول مۇمكىن ەمەس، ويتكەنى ول ءوز جەرىن ويلايدى، تۇرمەدەگى جازىقسىز جاپا شەككەندەردى ويلايدى. تەك ويىندا دىم دا جوق، ميسىز جاندار عانا باقىتتى، كۇلىپ-ويناپ ءجۇرۋى مۇمكىن، ويتكەنى باسقالاردىڭ قولى جەتپەي جۇرگەن ەۋروپا ەلىنىڭ تورىندە ءومىر ءسۇرىپ جاتىر عوي.
وسى وي مەنىڭ كەشەگى وتكەن سايلاۋدان كەيىن ۇنجىرعامدى ءتۇسىرىپ جىبەردى. قاراڭىزشى، كەشەگى دەپۋتاتتار حالىقتىڭ سەنىمىن ۇرلاپ دەپۋتات بولىپ الدى. بىردەن-اق حالىقتىڭ ەسەبىنەن كۇن كورە باستادى - قىمبات قوناق ۇيگە ورنالاستى، قىمبات توسبەلگىنى كەۋدەلەرىنە تاقتى. وسى مەن ۇرلىق جاسادىم-اۋ، ۇيات بولدى-اۋ دەگەن وي قانشاسىنىڭ باسىنا كىرىپ-شىققانىن كىم ءبىلسىن، بىراق كوبى ءوزىن-ءوزى اقتاۋعا كىرىسكەن دە بولار - ءبىزدىڭ نە كىنامىز بار، ءبىز ەمەس قوي سايلاۋدى وتكىزگەن، سايلاپ جاتسا ءبىز قايتەيىك دەگەن سياقتى.
سولايىنا سولاي دا شىعار، كىم ءبىلىپتى، بىراق... ەكى اۋىز انتتى جاتتاي الماي تۇرعانداردان ءپاتۋالى ءىس كۇتۋ دۇرىس بولا قويار ما ەكەن؟
ولاردى بىردەن حالىقتان بولەكتەپ، سەندەر ەندى باسقاسىڭدار، ادام قاتارىنداسىڭدار دەگەندەي، جەم شاشا باستادى. قانشاسى سول قۇرۋلى قاقپانعا بارىپ تۇسەدى - كەزىندە كورەرمىز، بىراق ءماجىلىستى ورىسشا باستاعانىنا قاراپ-اق ولاردىڭ كوبى سول قاقپانعا بارىپ تۇسەدى-اۋ دەپ تۇسىنگەن دۇرىس شىعار.
