Saıragúl Saýytbaı týraly rolık pe, álde qysqa metrajdy fılm be, sondaı birdeńe kórdim. Sonda ol eki eldegi demokratııany, Azııa men Eýropany, Qazaqstan (nemese Qytaı) men Shveııany salystyrady, bizdiń qanshalyqty artta qalǵanymyzǵa ishi ýdaı ashıdy. Baltyq teńiziniń jaǵalaýynda emin-erkin qydyrystap júr, eshkim mazalamaıdy. Jumysqa turý úshin shved tilin bilýi kerek eken, qazir birshama úırenip qalǵan. Ásirese balalar tez úırenýde deıdi. Til úırený kýrsy, jatatyn jeri, tamaǵy - bári tegin.
Elim dep aryp-ashyp, shekarany buzyp-jaryp kelgende biz óńmeninen keri ıterippiz. Áıteýir Qytaıǵa keri ustap bermeppiz, biraq bosqyn mártebesin de bermeppiz. Ol degen... kez-kelgen ýaqytta, abyr-sabyr, ajıotaj basylyp, saıabyrsyǵanda keri qaıtaryp jiberý de múmkin degen sóz ǵoı, únemi qorqynyshta qalaı ómir súrersiń, ol múmkin emes qoı.
Ol da eshteńe emes, meniń júregimdi aýyrtqany - men osynda jaqsy ómir súrip jatsam da Qytaıda qalǵan baýyrlarymdy, jazyqsyz jandardy oılaǵanda, esh kinási joq túrmege toǵytylǵandardyń jáýteńdegen kóz-janarlary kóz aldyma kelgende ózimdi qoıarǵa jer tappaımyn degeni boldy. Mine shyn janashyr adamnyń sózi. Shetelde júrse de ol tolyq baqytty bola almaıdy, ol múmkin emes, óıtkeni ol óz jerin oılaıdy, túrmedegi jazyqsyz japa shekkenderdi oılaıdy. Tek oıynda dym da joq, mısyz jandar ǵana baqytty, kúlip-oınap júrýi múmkin, óıtkeni basqalardyń qoly jetpeı júrgen Eýropa eliniń tórinde ómir súrip jatyr ǵoı.
Osy oı meniń keshegi ótken saılaýdan keıin unjyrǵamdy túsirip jiberdi. Qarańyzshy, keshegi depýtattar halyqtyń senimin urlap depýtat bolyp aldy. Birden-aq halyqtyń esebinen kún kóre bastady - qymbat qonaq úıge ornalasty, qymbat tósbelgini keýdelerine taqty. Osy men urlyq jasadym-aý, uıat boldy-aý degen oı qanshasynyń basyna kirip-shyqqanyn kim bilsin, biraq kóbi ózin-ózi aqtaýǵa kirisken de bolar - bizdiń ne kinámiz bar, biz emes qoı saılaýdy ótkizgen, saılap jatsa biz qaıteıik degen sııaqty.
Solaıyna solaı da shyǵar, kim bilipti, biraq... eki aýyz antty jattaı almaı turǵandardan pátýaly is kútý durys bola qoıar ma eken?
Olardy birden halyqtan bólektep, sender endi basqasyńdar, adam qataryndasyńdar degendeı, jem shasha bastady. Qanshasy sol qurýly qaqpanǵa baryp túsedi - kezinde kórermiz, biraq májilisti oryssha bastaǵanyna qarap-aq olardyń kóbi sol qaqpanǵa baryp túsedi-aý dep túsingen durys shyǵar.
