«حالىقارالىق تەاتر سىنشىلارى بىرلەستىگى» - «International Union of Theatre Critics» – ەلىمىزدىڭ جانە شەتەلدىڭ بەلگىلى كاسىبي تەاترتانۋشى ماماندارىنىڭ باسىن بىرىكتىرەتىن الاڭ. بىرلەستىكتىڭ باستى ماقساتى – بۇگىنگى قازاق تەاترىنىڭ نەگىزگى تەندەنتسيالارىن انىقتاپ، زاماناۋي تەاتر مەن دراماتۋرگيا ماسەلەلەرىن قاراستىرىپ، ونىڭ دامۋى جولىندا جۇمىس جاساۋ.
بۇگىندە ەلىمىزدەگى تەاترلاردا بولىپ جاتقان شىعارماشىلىق ۇدەرىس، ونىڭ دامۋ مەن باعىت-باعدارى، رەپەرتۋارىن جاساۋداعى ۇستانعان ساياساتى، كورەرمەننىڭ قويىلىمعا كەلۋى مەن قابىلداۋى ت.ب. ماسەلەلەرى جانە ول ۇدەرىستى دەر كەزىندە ساراپتامادان وتكىزۋ وتاندىق جانە حالىقارالىق تەاتر قاۋمداستىعى، كاسىبي ماماندار جانە رەسمي مەمكەمەلەر تاراپىنان قىزىعۋشىلىق تۋدىرىپ وتىر.
وسىعان وراي، وتكەن جىلى نەگىزى قالانعان بىرلەستىك بيىل دا ءداستۇرلى تۇردە 2020 جىلداعى قازاقستان تەاترلارىنىڭ جاساعان جۇمىستارىنا كاسىبي باعالارىن بەرىپ، ساراپقا سالدى. جۇمىس ناتيجەسىن انىقتاۋ ماقساتىندا ارنايى قۇراستىرىلعان ساۋالناما سۇراقتارى ەلىمىزدىڭ بارلىق تەاترلارىنا جىبەرىلگەن. اتالمىش جىلدىڭ 14 قاڭتار كۇنى ساۋالناماعا قاتىسقان تەاترلاردىڭ دەرەكتەرى نەگىزىندە مونيتورينگ جۇمىسى جۇرگىزىلىپ، شىعارماشىلىق ءارى ساندىق كورسەتكىشى بويىنشا «قازاقستان تەاترلارى – 2020» اتتى ونلاين كونفەرەنتسيا ۇيىمداستىرىلىپ، «سىنشىلار جۇلدەسى» تابىستالدى.
وسى تۇستا ەلىمىزدەگى ۇلتتىق، اكادەميالىق، مەملەكەتتىك وبلىستىق، قالالىق ستاتۋسىن يەلەنگەن 60-قا جۋىق رەسپۋبليكالىق، وبلىستىق جانە قالالىق دەڭگەيدەگى دراما، مۋزىكالىق دراما، كومەديا، قۋىرشاق تەاترلارىنىڭ ىشىنەن الماتى قالاسىنىڭ مەملەكەتتىك قۋىرشاق تەاترى تومەندەگى نوميناتسيالار بويىنشا ۇزدىك دەپ تانىلدى:
- «ۇزدىك بالالارعا ارنالعان قويىلىم – «ۇيشىك» سپەكتاكلى»;
- «باق-پەن ۇزدىك جۇمىس جاساعان تەاتر»;
- «ونلاين فورماتتاعى ەڭ بەلسەندى تەاتر».
سونداي-اق، تەاتردىڭ تالانتتى رەجيسسەرى انتون زايتسەۆ رەسپبۋليكا بويىنشا ۇزدىك توپ-5 رەجيسسەرلەر قاتارىنان تابىلدى.
ايتا كەتەرلىگى، 2019 جىلعى ناتيجە بويىنشا مەملەكەتتىك قۋىرشاق تەاترى «باق-پەن ۇزدىك جۇمىس جاساعان تەاتر»، «ۇزدىك بالالارعا ارنالعان قويىلىم» نوميناتسيالارى بويىنشا دا ۇزدىك دەپ تانىلىپ، كاسىبي ماماندار تاراپىنان جوعارى باعاعا يە بولعان.
بۇگىندە ۇلتتىڭ رۋحاني قاجەتتىلىگىن وتەپ، قازاقتىڭ قۋىرشاق تەاترى ونەرىن وركەندەتىپ، كەشەگى مەن بۇگىنگى ءومىر اراسىن ونەردىڭ بيىك شىڭى ارقىلى شىنايى كورسەتە ءبىلۋدى ماقسات تۇتقان مەملەكەتتىك قۋىرشاق تەاترىنىڭ باعىتى مەن باعدارىنىڭ دۇرىس ەكەندىگىن وسىدان اڭعارۋعا بولادى.
گۇلىم كوپبايقىزى
