بۇگىن حالىقارالىق تۇركى اكادەمياسى نۇر-سۇلتان قالاسىندا تۇركى مەملەكەتتەرى تاۋەلسىزدىگىنىڭ 30 جىلدىعى اياسىندا ازەربايجان باعىتىنداعى بىرقاتار كىتاپتاردىڭ تۇساۋكەسەر شاراسىن وتكىزدى.
القالى جيىنعا حالىقارالىق تۇركى اكادەمياسىنىڭ پرەزيدەنتى دارحان قىدىرالى، ازەربايجان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى راشاد ماممادوۆ، قىرعىز رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى جەەنبەك كۋلۋباەۆ، وزبەكستان رەسپۋبليكاسىنىڭ قازاقستان رەسپۋبليكاسىنداعى ەلشىلىگىنىڭ ءبىرىنشى حاتشىسى مۋزاففار ۋسمانوۆ، ازەربايجان ميللي مەدجليسىنىڭ دەپۋتاتى، مادەنيەت كوميتەتىنىڭ ءتورايىمى، گانيرا پاشاەۆا، قىرعىزستاننىڭ ەكس-مەملەكەتتىك حاتشىسى وسماناكۋن يبرايموۆ، ەۋرازيا جازۋشىلار وداعىنىڭ توراعاسى ياكۋب ومەروگلۋ، س.سەيفۋللين مۋزەيىنىڭ ديرەكتورى نەسىپبەك ايتۇلى، قازاقستان جازۋشىلار وداعى نۇر-سۇلتان قالالىق فيليالىنىڭ ديرەكتورى داۋلەتكەرەي كاپىۇلى، سونداي-اق، مەملەكەت جانە قوعام قايراتكەرلەرى، تانىمال عالىمدار مەن زيالى قاۋىم وكىلدەرى قاتىستى.
شارا بارىسىندا تۇركى اكادەمياسى ازىرلەگەن «قاراباق – ازەربايجاننىڭ جاۋھارى: تاريحى، مادەنيەتى، تابيعاتى»، «جوعالتقان باقىتىم:قاراباقتىڭ شىنايى وقيعالارى» جانە «ازەربايجان حالىق رەسپۋبليكاسى» اتتى كىتاپتاردىڭ تانىستىرىلىمى ءوتتى.
سونىمەن قاتار، اكادەميا باسشىسى دارحان قىدىرالى باۋىرلاس ەلدەر اراسىنداعى ىنتىماقتاستىقتى نىعايتۋعا قوسقان ولشەۋسىز ۇلەسى ءۇشىن ازەربايجان رەسپۋبليكاسىنىڭ قازاقستانداعى توتەنشە جانە وكىلەتتى ەلشىسى راشاد ماممادوۆتى حالىقارالىق تۇركى اكادەمياسىنىڭ ارنايى مەدالىمەن ماراپاتتادى.
