«ارسەلورميتتال تەمىرتاۋ» اق شاحتاسىنداعى اپات ورىن الدى. بۇل تۋرالى «ادىرنا» تىلشىسىنە قازاقستان رەسپۋبليكاسى توتەنشە جاعداي ءمينيسترىنىڭ ءباسپاسوز قىزمەتى حابارلادى.
2021 جىلعى 13 قاڭتاردا ساعات 21.53-تە «ارسەلورميتتال تەمىرتاۋ» اق كومىر دەپارتامەنتىنىڭ «لەنين اتىنداعى» شاحتاسىندا (گوريزونتى 340, تەرەڭدىگى 840 مەتر) بارلاۋ ۇڭعىماسىن بۇرعىلاۋ كەزىندە مەتان گازى مەن كومىردىڭ ۇساق فراكتسيالارى ءبولىندى.
بۇل كۇنى ءۇش جۇمىسشى، اتاپ ايتقاندا بۇرعىلاۋ قوندىرعىسىنىڭ ءماشينيسى، ءماشينيستىڭ كومەكشىسى، سونداي-اق جەلدەتۋ جانە قاۋىپسىزدىك تەحنيكاسى ۋچاسكەسىنىڭ تاۋ-كەن شەبەرى ۇڭعىما تۇبىندە بارلاۋ جۇمىستارىن جۇرگىزىپ جاتقان.
اپات سالدارىنان تاۋ-كەن شەبەرى مەن ءماشينيستىڭ كومەكشىسى اپات ورنىنان دەرەۋ كەتىپ قالدى، ال ماشينيست ۇڭعىما تۇبىنەن شىعا المادى.
اپات كەزىندە شاحتادا ءۇشىنشى اۋىسىمنىڭ 137 قىزمەتكەرى بولعان. ولاردىڭ 136-سى جەر بەتىنە شىعارىلدى.
كاسىپورىننىڭ اۆاريالىق-قۇتقارۋ قىزمەتى كەلگەننەن كەيىن دەرەۋ شاحتاعا ءتۇستى. ساعات 23.00-دە اەروگازدى باقىلاۋ اپپاراتۋراسىنىڭ كورسەتكىشتەرىنە سايكەس شاحتانىڭ تاۋ-كەن قازبالارىنداعى گاز جاعدايى قالىپقا كەلدى. اۆاريالىق-قۇتقارۋ قىزمەتىنىڭ بولىمشەسى ۇڭعىما تۇبىندەگى تاۋ-كەن ماسساسىن تازالاۋدا.
زارداپ شەككەن ءبىر ادامدى ىزدەستىرۋ جۇمىستارى جالعاستىرىلۋدا. ىزدەستىرۋ جۇمىستارىنا شاحتانىڭ 17 قىزمەتكەرى مەن اۆاريالىق-قۇتقارۋ قىزمەتىنىڭ ەكى بولىمشەسى (16 ادام) جۇمىلدىرىلدى.
اتالعان اپاتتى تەكسەرۋ ءۇشىن قر تجم ونەركاسىپتىك قاۋىپسىزدىك كوميتەتىنىڭ قاراعاندى وبلىسى بويىنشا دەپارتامەنتىنىڭ جانىندا كوميسسيا قۇرىلدى.
"ادىرنا" ۇلتتىق پورتالى
فوتو اشىق دەرەككوزدەن الىندى
